Jyldyq ınflıatsııadaǵy aqyly qyzmetter úlesi ulǵaıyp keledi – Ulttyq bank

ASTANA. QazAqparat – Jyldyq ınflıatsııadaǵy aqyly qyzmetter úlesi ulǵaıyp keledi. Bul týraly Úkimet otyrysynda Ulttyq bank tóraǵasy Tımýr Súleımenov aıtty, dep habarlaıdy QazAqparat tilshisi.

«Alty aı ishinde jyldyq ınflıatsııa tómendep keledi. Onyń qazirgi deńgeıi – 13,1 paıyz. Jyldyq ınflıatsııadaǵy azyq-túlik pen azyq-túlikke jatpaıtyn komponenttiń úlesi azaıyp, aqyly qyzmetter ınflıatsııasynyń úlesi ulǵaıýda. Jyldyq ınflıatsııanyń tómendeýine qaramastan, aılyq ınflıatsııa shildedegi 0,6 paıyzdan 0,7 paıyzǵa deıin jedeldedi. Aılyq ınflıatsııanyń ósý qarqyny ortasha mánderden joǵary qalyptasyp keledi», - dedi UB tóraǵasy.

Onyń dereginshe, azyq-túlik ınflıatsııasy tamaq ónimderin óndirýshilerdiń jáne aýyl sharýyshylyǵyndaǵy baǵanyń tómendeýine baılanysty 12,4 paıyzǵa deıin baıaýlady. Jemis-jıdek pen kókónis ónimderi maýsymdyq kezeńge baılanysty arzandap keledi. Biraq ótken jyldarmen salystyrǵanda tómen.

«Azyq-túlikke jatpaıtyn ınflıatsııa tamyzda 13,5 paıyzdy qurap, jyldyq kórsetkish baıaýlady. Aldyńǵy aılarda teńgeniń nyǵaıýyna baılanysty jeke paıdalanýǵa arnalǵan taýarlar, turmystyq zattar, qurylys materıaldary, dári-dármek baǵalarynyń ósimi baıaýlap jatyr. Janar-jaǵarmaıdyń sáýir aıynan bastap shekti bólshek saýdadaǵy baǵasynyń ósýine baılanysty onyń azyq-túlikke jatpaıtyn ınflıatsııadaǵy úlesi ulǵaıýda. Tamyzda kıim-keshek pen aıaq kıim, turmystyq tehnıka, avtomobıl, gaz baǵasynyń aıtarlyqtaı óskeni tirkeldi», - dedi Tımýr Súleımenov.

UB tóraǵasynyń aıtýynsha, Turǵyn úı kommýnaldyq qyzmetter tarıfiniń ósýine baılanysty aqyly qyzmetter ınflıatsııasy jedeldeı tústi. Tarıfter tamyzda – 6,1, jyldyq kórsetkishte 13,9 paıyzǵa ósti.

«Sonymen qatar, halyqtyń turaqty suranysyna baılanysty rettelmeıtin qyzmetterdiń baǵasy ósimin saqtap qalyp otyr. Onyń ishinde – qalalyq avtokólikpen jol, uıaly baılanys qyzmetteri men jaldaý aqysy», - dedi ol.

Osyǵan deıin Qazaqstanda jańa eksporttyq-kredıttik agenttik qurylatyny habarlandy.