Jyldamdyq asyratyn júrgizýshilerge qarsy jańa júıe engizilip jatyr

ASTANA. QazAqparat – Elimizde vıdeotaldaý júıesi engiziledi. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Búginde ondaǵan, tipti júzdegen myń vıdeokamera bar jáne olardyń árqaısysyndaǵy aqparatty taldaý múmkin emes. Sondyqtan da vıdeotaldaý júıesi bolýy qajet. Búginde ol ІІM Jedel baqylaý ortalyǵynyń bazasynda qurylyp jatyr. Ol qanshalyqty naqty bolǵan saıyn, quqyqtyq tártiptiń jaqsarýy da sonshalyqty tıimdi bola túsedi. 10 monıtordy qadaǵalap otyrǵan adamnyń jumys tıimdiligi 15 mınýttan keıin 10 paıyzǵa deıin quldyraıtyndyǵy dáleldengen», - dedi mınıstr «Jasandy ıntellekt jáne sot pen quqyq qorǵaý júıesindegi úlken derekter: shyndyq jáne ýaqyt talaby» atty halyqaralyq ǵylymı-tájirıbelik konferentsııa barysynda.

Onyń atap ótýinshe, sondyqtan da vıdeotaldaý júıesi bizdiń kúndelikti ómirimizge mindetti túrde engizilýi kerek.

«Jol polıtsııalaryna aıyppul jazyp berý úshin berilgen qarapaıym planshet preventıvti taldaý, preventıvti jumys quralyna aınalýy tıis. Adam 10 kamera tusynan saǵatyna 200 shaqyrymmen ótip, aıyppul tólegen soń jónine kete beretin jaıttar jıi bolady. Mundaı jaıttyń aldyn alý úshin ne isteý kerek? Eger, adam 3-4 kamera tusynan óte joǵary jyldamdyqpen ótse, onda sol jerde turǵan jasaqtan aqparat birden planshetke túsýi tıis. Avtomobıl qandaı kóshe qıylysynda bolatyndyǵy kórsetilip, kelesi jasaq ony toqtatýy qajet. Qazirdiń ózinde ІІM-men mundaı ázirlemeni synaqtan ótkizip jatyrmyz jáne ol ózin oń jaǵynan kórsetip otyr», - dedi Baǵdat Mýsın.