Jyl sońynda qazaq tilin tegin úıretetin «Qazaqsha-online» ınternet-portaly iske qosylady
Bul týraly búgin Astanada ótken baspasóz máslıhatynda Memlekettik tildi damytý qorynyń dırektory Azat Shaýeev aıtty.
Onyń aıtýynsha, joba atalǵan qordyń bastamasymen «Qazaqstan - 2050» Strategııasynda aıtylǵan mindetterdi oryndaý maqsatynda QR Tuńǵysh Prezıdenti qorynyń jáne «Samsung Electronics Kazakhstan and Central Asia» kompanııasynyń qoldaýymen júzege asyrylady.
«Memlekettik tildi tegin úıretetin ınternet-portaldyń jumysyna elimizge belgili ǵalymdar toby tartylyp otyr. Olar barlyq ádistemelik málimetterdiń 50 paıyzyn daıyndap qoıdy. Jospar boıynsha, portal 2013 jyldyń 31 jeltoqsanyna deıin iske qosylady», - dep atap ótti A. Shaýeev.
Onyń aıtýynsha, onlaın kýrs táýlik boıy jumys isteıtin bolady. Oqý baǵdarlamasy qazaq tilin tıimdi ádis-tásilder arqyly jedel meńgerýge jáne til úırenýshilerge alynǵan bilik-daǵdylaryn kúndelikti ómirde erkin paıdalanýǵa múmkindik beredi. Jobada úırenýge tıimdi oqý materıaldary men aqparattyq júıedegi jańasha mýltımedııalyq múmkindikter, atap aıtsaq, grafıkalyq sýretter men anımatsııa túrleri, aýdıo jáne beıne materıaldar úılestirile berilmek.
Aıta ketý kerek, baspasóz máslıhaty barysynda «Memlekettik tildi damytý» Qory men «Samsung Electronics Kazakhstan and Central Asia» kompanııasy ózara yntymaqtastyq týraly memorandýmǵa qol qoıdy.