Jyl sońyna deıin veterınarııa júıesin reformalaýǵa qatysty naqty sharalar qabyldanady - Toqaev

NUR-SULTAN. QazAqparat – Úkimet jyl sońyna deıin veterınarııa júıesin reformalaý jóninde naqty sharalar qabyldaýy kerek. Bul týraly Memleket basshysy Qasym-Jomart Toqaev Qazaqstan halqyna arnalǵan Joldaýyn jarııalaý kezinde málim etti, dep habarlaıdy QazAqparat tilshisi.

«Veterınarııa salasyn da jetildirý qajet. Bul salada ortalyq pen óńirler arasynda mindetter men quzyretter naqty bólinýi kerek. Mal basynyń amandyǵy jáne ónimdiligi jergilikti veterınarlardyń tıimdi jumysyna baılanysty. Bul, túptep kelgende, aýyldaǵy aǵaıynnyń ál-aýqatyna tikeleı áser etedi. Veterınarııa qyzmeti qazirgi zaman talabyna saı bolmasa, aýyl sharýashylyǵy ónimderiniń eksportyn arttyrý múmkin emes», - dep qadaı aıtty Memleket basshysy.

Osy oraıda Prezıdent bul salada júıeli jumys atqarylýy tıis ekenin atap ótti. Atap aıtqanda, úderisterdi tsıfrlandyrý, málimet jınaý ári ony avtomattandyrý, maman daıarlaý jáne olardyń jalaqysyn kóbeıtý sharalaryn eskerý kerek.

«Úkimet jyl sońyna deıin veterınarııa júıesin reformalaý jóninde naqty sharalar qabyldaýy kerek», - dedi Q. Toqaev.