Jyl sońyna deıin Qazaqstan arqyly Ózbekstanǵa 80 myń tonna reseılik munaı jetkiziledi

ASTANA. QazAqparat - «QazTransOıl» AQ 2017 jyldyń sońyna deıin óziniń qubyrlary arqyly Ózbekstan baǵytyna 80 myń tonna reseılik munaıdy tasymaldaýdy josparlap otyr. Bul jaıynda atalǵan kompanııanyń baspasóz qyzmetinen málim etti, dep habarlaıdy QazAqparat.

«Munaı qubyry arqyly Shaǵyr munaı quıý estakadasyna deıin aıdalatyn bolady. Sol jerde tsısternalarǵa quıylyp, temirjol arqyly Ózbekstanǵa deıin tasymaldanady. Munaıdy jetkizý kestesine sáıkes qarashada tasymaldanatyn kólem 30 myń tonnany quraıdy. 2017 jyldyń sońyna deıin atalǵan baǵdar boıynsha 80 myń tonnaǵa deıin shıkizatty tasymaldaý josparlanyp otyr», - dedi «QazTransOıl» AQ bas dırektory Dımash Dosanov.

Aıta keteıik, Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy 2017 jylǵy 16 qyrkúıektegi bas kelisimmen Reseıde shyǵarylǵan munaıdy Qazaqstan Respýblıkasynyń aýmaǵy arqyly Ózbekstan Respýblıkasyna, onyń ishinde «QazTransOıl» AQ magıstraldyq qubyrlarymen «Shaǵyr» munaı quıý pýnktine deıin jetkizý quptalǵan bolatyn.

20 qarashadaǵy derekterge sáıkes «QazTransOıl» magıstraldy munaı qubyry júıesine 20,95 myń tonna munaı qabyldanyp, «Shaǵyr» munaı quıý pýnktinde temirjol tsısterlaryna 13,3 myń tonna reseılik munaı quıyldy.