Jyl sońyna deıin elordanyń Almaty aýdanynda 10 qoǵamdyq keńistik abattandyrylady

ASTANA. QazAqparat – Bıyl aýdanymyzda abattandyrý jumystary júrgiziletin qoǵamdyq keńistikter sanyn 10-ǵa jetkizýdi josparlap otyrmyz. Bul týraly qalalyq kommýnıkatsııalar qyzmetinde ótken brıfıngide Astana qalasy Almaty aýdanynyń ákimi Maqsat Samatuly aıtty, dep habarlaıdy QazAqparat tilshisi.

«Bizdiń aýdanymyzda 20 myńnan astam jaryqtandyrý kózderi ornalastyrylǵan. Onyń ishinde 2022 jyly biz 9 myńǵa jýyq jańa úlgidegi jaryqdıodty shamdardy aýystyrdyq. Sonymen qatar, 4,5 myńǵa jýyq shamdar shaǵyn alaptar men aýdandarda aýystyrylǵan bolatyn. Kóshelerdi jaryqtandyrý jumystary jalǵasýda. Atap aıtqanda, bizdiń aýdynymyzda 344 kóshe ornalasqan bolsa, onyń 315 bizdiń aýdanmen qyzmet kórsetiledi. Qalǵan 29 kóshe búgingi kúni teńgerimge tapsyrylyp jatyr. 2023 jylǵy josparǵa keletin bolsaq, biz 1,5 myńǵa jýyq jaryqdıodty shamdardy aýystyramyz dep otyrmyz. Qorytyndylaı kele, jyldyń sońynda bizdiń aýdanymyzdyń 95 paıyzy jaryqdıodty shamdarmen qamtamasyz etiletin bolady», - dedi aýdan ákimi.

Maqsat Samatulynyń málimetinshe, byltyr aýdan aýmaǵyndaǵy 8 qoǵamdyq keńistikke abattandyrý jumystary júrgizilgen.

«2022 jyly aýdanymyz boıynsha 8 qoǵamdyq keńistik abattandyryldy. Bıyl abattandyrý jumystary júrgiziletin osyndaı obektiler sanyn 10-ǵa jetkizýdi josparlap otyrmyz. Eń úlken joba – ol Q.Sátpaev kóshesin tolyq abattandyrý. Qazir bul máseleni turǵyndarmen talqylap jatyrmyz. ıAǵnı, bul aýmaqtardy qalaı ózgertemiz, jaıaý júrginshilerge qolaıly jaǵdaı jasaý, balalarǵa arnalǵan oıyn alańdaryn qaıda ornalastyrý kerek degen suraqtardy pysyqtaý ústindemiz», - dedi Maqsat Samatuly.

Onyń aıtýynsha, mundaı jumystar bıyl Abylaı han dańǵyly boıynda da júrgizilmek.