Jyl sońyna deıin balabaqshalarda jańadan 81 myń oryn ashylady - mınıstr

ASTANA. QazAqparat - Oqý-aǵartý mınıstri Ǵanı Beısembaev búgin Memleket basshysynyń qabyldaýynda bolǵanda, mektepke deıingi, orta, tehnıkalyq jáne kásiptik bilim berýdi damytý men balalar qaýipsizdigin qamtamasyz etý boıynsha atqarylǵan sharalar týraly baıandaǵanyn málimdedi, dep habarlaıdy QazAqparat.

«Prezıdenttiń tapsyrmasyna saı bilim salasynyń barlyq baǵytynda aýqymdy jumys júrgizilip jatyr. Bıyl qyrkúıekten bastap mektepke deıingi oqytý jáne tárbıe berý uıymdary tárbıeshileriniń jalaqysy 30% ósedi. Mektepke deıingi bilim berý salasynda kadr daıarlaý jáne olardyń áleýetin nyǵaıtý júıesi jańǵyrtyldy. Bıyl 20 myńnan astam pedagog biliktiligin arttyrý kýrstarynan óte bastady. Sondaı-aq, kolledjder maman daıarlaýda balabaqshalarmen birge aımaqtyq erekshelikterge beıimdelgen arnaıy bilim berý baǵdarlamalaryn ázirlep otyr», - dep jazdy mınıstr áleýmettik jelidegi paraqshasyna.

Onyń málimetinshe, 2023 jyldyń aıaǵyna deıin balabaqshalarda jańadan 81 myń oryn ashý josparlanyp otyr. Mınıstrlik balabaqsha kezeginiń biryńǵaı bazasyn qurýdy qolǵa aldy. Bul sharalardyń bári kezektegi qaıtalaýdy joıýdy, sybaılas jemqorlyq qaterin azaıtýdy, bıýdjetti tıimdi jumsaýdy jáne eń bastysy, ashyqtyqty qamtamasyz etýdi kózdeıdi.

«Pedagogterdi attestattaý rásimi jetildirildi. Pedagogtiń kásibı quzyreti tek pán boıynsha bilimi, al jumysynyń nátıjesi bilim alýshylardyń oqý jetistikterine súıenip baǵalanady. Bul máseleni talqylaýǵa usynǵanda, óńirlerdegi áriptesterim de qoldaıtynyn bildirdi.

Memleket basshysyna Aýyl mektepterin damytý tujyrymdamasyn tanystyrdym. Bul jobany iske asyrýda Bilim-ınnovatsııa lıtseıi, RFMM, NZM, Abaı atyndaǵy daryndy balalarǵa arnalǵan respýblıkalyq mamandandyrylǵan mektep-ınternatynyń ozyq tájirıbeleri eskeriledi.

Qyzmetke kirisken sátten bastap muǵalimdermen, tehnıkalyq jáne kásiptik bilim berý uıymdarynyń dırektorlarymen, kásiporyn basshylarymen birqatar kezdesýler ótkizdim. Basty mindet – shaǵyn kásiporyndar men oqý sharýashylyqtaryn qurý arqyly kolledjderdi derbes qurylymǵa aınaldyrý. Bıyldan bastap kásiporyndar kolledj túlegin mindetti jumysqa ornalastyrý shartymen kadrlardy maqsatty oqytýǵa qatysady. Qazir tehnıkalyq jáne kásiptik bilim berý stýdentteriniń 80% tegin bilim alyp jatyr. Bıylǵy qyrkúıekten bastap olardyń shákirtaqysy 50% artady, al aldaǵy jyly bul kórsetkish 100 paıyzǵa deıin jetkiziledi», - dep jazdy Ǵanı Beısembaev.

Nátıjeni kózdep jumys isteýde basymdyq berilgen taǵy bir mańyzdy baǵyt –oblys ákimdikterimen birlesip Bilim berý júıesin damytýdyń óńirlik jol kartalaryn qabyldaý.

«Memleket basshysy bilim berý júıesine únemi qoldaý kórsetip keledi. Endigi jerde tárbıe jumysyn kózdeıtin sharalarǵa bárimiz birge qarqyn berýimiz qajet. Bizdiń aldymyzda úlken mindet tur! Memleket basshysynyń tapsyrmalaryn sapaly oryndaý úshin jańa oqý jylynda birlese jumys istep, jańa nátıjege qol jetkizemiz dep senemin», - degen mınıstr.