Jyl sońyna deıin astanada 28 myń jumys orny ashylady
«Jyl sońyna deıin 28 myń jumys ornyn ashý josparlanyp otyr. Onyń ishinde 17 myń turaqty, 11 myń ýaqytsha jumys oryndary bolady. 1 shildedegi jaǵdaı boıynsha 12,5 myńǵa jýyq jumys orny quryldy. Búginde «Enbek.kz» portalynda 7 myńnan astam bos jumys orny tirkeldi», - dedi Azamat Baıtasov.
Sondaı-aq, ortalyq jyl basynan beri jumyspen qamtylǵan múgedektigi bar azamattar týraly da derektermen bólisti. Oǵan sáıkes, bıyl 7 arnaıy jumys orny ashylǵan.
«Halyqty jumyspen qamtý ortalyǵynyń mańyzdy baǵyttarynyń biri - halyqtyń áleýmettik osal toptaryn qoldaý, olardy jumyspen qamtý jáne qoǵamdyq ómirge tartý. Aǵymdaǵy jyldyń basynan qyzmetke ornalasýǵa 454 múmkindigi shekteýli azamat ótinish bildirdi. Onyń 450-ne jumys berildi. Atap aıtqanda, turaqty jumys oryndaryna – 174, qoǵamdyq jumystarǵa – 255, jastar praktıkasy boıynsha – 5, áleýmettik jumys oryndaryna – 5, alǵashqy jumys orny baǵdarlamasy boıynsha – 3, kúmis jas baǵdarlamasymen – 1 adam jumysqa turdy. Al, kásiptik oqytý kýrstaryna múmkindigi shekteýli 7 adam joldandy», – dep atap ótti Nur-Sultan qalasy ákimdigi halyqty jumyspen qamtý ortalyǵynyń dırektory.
Azamat Baıtasovtyń dereginshe, múmkindigi shekteýli azamattarǵa arnalǵan jumys oryndaryn qurý kezinde arnaıy jabdyqtardy satyp alý úshin memleket sýbsıdııa bóledi. Máselen, estý qabiletinde aqýy bar azamattar qyzmet etetin bir jumys ornyna - 1 004 250 teńge, al tirek-qımyl apparaty buzylǵan elordalyqtar eńbek etetin bir kásiporynǵa - 765 000 teńge bólinedi.
Eske sala keteıik, buǵan deıin bıylǵy bes aıda 5 myńnan astam elordalyqtyń jumyspen qamtylǵanyn jazǵan edik.