Jyl sońyna deıin 7 myńnan astam astanalyq úleskerdiń máselesi sheshiledi

NUR-SULTAN. QazAqparat – Elordada jyl sońyna deıin qurylysy bitpeı, problemaǵa aınalǵan 57 kóppáterli turǵyn úı paıdalanýǵa beriledi. Bul týraly qalalyq orta sapasy jáne baqylaý basqarmasynyń basshysy Dáýlet Dosqulov málim etti, dep habarlaıdy QazAqparat tilshisi.

«Elorda qurylys» kompanııasynyń basty maqsaty - bitpeı qalǵan problemaly qurylys nysandaryn aıaǵyna deıin jetkizý jáne aldanǵan úleskerlerdiń máselesin sheshý. Aıaqtalmaı qalǵan nysandardyń qurylysyna qarjy ulttyq qordan, respýblıkalyq jáne jergilikti bıýdjetten qarastyrylyp otyr. Basty shart - jumsalǵan qarjy qazynaǵa qaıtarylýy tıis. Demek kináliler óteıdi», - dedi Dáýlet Dosqulov qalalyq máslıhattyń otyrysynda.

Onyń aıtýynsha, úleskerlerdiń máselesi elorda ákimdiginiń erekshe baqylaýynda.

«Statıstıkaǵa kelsek, 2018 jyly elordada qurylysy bitpeı, problemaǵa aınalǵan 150 turǵyn úı boldy. 2019 jyly qala ákimdigi 13 turǵyn úı qurylysyn aıaqtap, 2,5 myń úleskerdiń máselesin sheshti. Ótken jyly 20 problemaly turǵyn úı óz sheshimin taýyp, úleskerler qonys toıyn toılady. Bıyl jyl bastalǵaly qala ákimdigi 98 qurylysy problemaǵa aınalǵan nysandy óz baqylaýyna aldy. Bul degenimiz 10 myńnan astam úlesker degen sóz. Onyń ishinde «Nurly jer» turǵyn úı baǵdarlamasy aıasynda 27 kóppáterli turǵyn úıdiń qurylysy aıaqtaldy. Jyl sońyna deıin 57 problemaly kóppáterli turǵyn úıdiń qurylysyn aıaqtap, 7400-den astam úleskerdiń máselesi sheshilmek», - deıdi ol.