Jyl saıyn sý tasqynynan Qazaqstan ekonomıkasyna 419 mln dollar shyǵyn keledi

ASTANA. QazAqparat – Sý resýrstaryn basqarý júıesin damytýdyń 2023-2029 jyldarǵa arnalǵan tujyrymdamasynda elimizdegi sý tasqynyna sebep bolyp otyrǵan faktorlar jazylǵan, dep habarlaıdy QazAqparat tilshisi.

«Maýsymdyq sý tasqyny úlken ekonomıkalyq shyǵynǵa ushyratady, halyqtyń ómiri men densaýlyǵyna qaýip tóndiredi. Ortalyq Azııanyń óńirlik ekologııalyq ortalyǵynyń esebine sáıkes, Qazaqstan ekonomıkasyna sý tasqyny saldarynan 419 mln dollar ortasha jyldyq shyǵyn keledi. Sý tasqynynan zardap shekken adamdardyń ortasha jyldyq sany shamamen 156 myń», - dep kórsetilgen Ashyq NQA portalynda jarııalanǵan tujyrymdamada.

Ekologııa mınıstrliginiń dereginshe, sý tasqynyna negizgi sebep - mańyzdy obektilerdiń durys qorǵalmaýy, zamanaýı tehnologııalardyń bolmaýy, gıdrologııalyq boljamdardyń durys júrgizilmeýi.

«Buǵan irgeles memleketterdiń kelisilmegen áreketteri de sebep bolady. Máselen, Ózbekstan aýmaǵyndaǵy Sardoba sý qoımasyndaǵy apat. Tótenshe jaǵdaılar jónindegi qyzmet, «Qazsýshar» jáne «Qazgıdromet» boljamdy-taldamalyq jumysy nashar uıymdastyrylǵan. Negizinen áreket etý sharalary faktiden keıin jasalady, boljam álsiz júrgiziledi. Bul rette aýa raıynyń ózgerýine, sýdyń aǵymdaǵy temperatýrasyna, muz ben jaýyn-shashynnyń erý qarqyndylyǵyna tıisti kóńil bólinbeıdi», - degen máseleler qozǵalǵan qujatta.

Tujyrymdama jobasy 20 maýsymǵa deıin kópshilik talqylaýynda bolady.