Jyl saıyn obyrdan 13 myńnan astam qazaqstandyq kóz jumady

ASTANA. QazAqparat – Elimizde onkologııalyq aýrýlar boıynsha 205 myńnan astam patsıent dınamıkalyq baqylaýda tur, dep habarlaıdy QazAqparat tilshisi.

Bul týraly Densaýlyq saqtaý mınıstri Ajar Ǵınııat Úkimet otyrysynda aıtty.

«Qazirgi tańda Qazaqstanda onkologııalyq aýrýlar boıynsha 205 myńnan astam patsıent dınamıkalyq baqylaýda.

Jyl saıyn 37 myńnan astam jańa jaǵdaı anyqtalady. Áıelderdiń arasynda aýrýshańdyq erlermen salystyrǵanda azdap joǵary. Bul aýrýshańdyq qurylymynda birinshi orynda sút bezi obyrynyń turýymen túsindiriledi. Eńbekke qabiletti adamdardyń syrqattanýy 56% bolyp otyr», - dedi mınıstr.

Onyń málimeti boıynsha, jyl saıyn elde 13 myńnan astam adam obyrdan qaıtys bolady.

«Aýrýshańdyqtyń qurylymyn qarasaq, 1-orynda sút bezi obyry (13,2%), 2-orynda ókpe obyry (10%), 3-orynda kolorektaldyq obyr (9,3%) tur.

Jyl saıyn elde obyrdan 13 myńnan astam adam qaıtys bolady. Ólim qurylymynda birinshi orynda ókpe obyry (16,3%), ekinshi orynda - asqazan obyry (12%), úshinshi orynda - toq ishek obyry -10,6%)», - dedi Ajar Ǵınııat.