Jyl saıyn medıtsına qyzmetkerlerine qatysty 300-ge jýyq is qozǵalady - mınıstrlik

ASTANA. QazAqparat – QR Densaýlyq saqtaý mınıstri Ajar Ǵınııat medıtsına qyzmetkerlerine qatysty qozǵalǵan qylmystyq ister týraly aıtty, dep habarlaıdy QazAqparat tilshisi.

«Zań jobasyn ázirleý úshin 2018-2020 jyldary jeke ári zańdy tulǵalardan kelip túsken jáne qaralǵan ótinishterge, sondaı-aq 2017-2020 jyldary medıtsına qyzmetkerlerine qatysty qozǵalǵan qylmystyq isterge taldaý júrgizildi. Jyl saıyn medıtsına qyzmetkerlerine qatysty kásiptik mindetterin tıisinshe oryndamaǵany úshin QR Qylmystyq kodeksiniń 317-baby boıynsha shamamen 300-ge jýyq is qozǵalady», - dedi A. Ǵınııat Májiliste «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn tanystyrý kezinde.

Onyń aıtýynsha, qylmystyq ister kóbinese hırýrgııalyq beıindegi mamandarǵa qatysty bolyp tur. Sebebi bul baǵytta ólim-jitim táýekeli joǵary.

«Zardap shekkenderdiń paıdasyna moraldyq jáne materıaldyq zalal ótemaqysyn tóleýdiń jalpy somasy jylyna 40 mıllıon teńgeden asady eken. Saqtandyrý tólemderi sottyń sheshimi boıynsha saqtandyrý polısi bolǵan kezde júzege asyrylady. Qylmystyq jaýaptylyq tanylǵan jaǵdaıda tólenbeıdi», - dedi mınıstr.

«Osyndaı medıtsınalyq jaǵdaı bolǵan kezde medıtsına qyzmetkeri jalaqysynyń deńgeıi naýqastyń densaýlyǵyna keltirilgen zııandy óz betinshe óteýge múmkindik bermeıdi», - dedi vedomstvo basshysy.

Budan buryn habarlanǵandaı, medıtsına qyzmetkerleriniń kásiptik jaýapkershiligi boıynsha mindetti saqtandyrý júıesi engiziledi.