Jyl saıyn quny 500 mln dollar bolatyn shetelden ákelingen kólikter tirkeýden ótpeıdi

ASTANA. QazAqparat – Jyl saıyn jalpy quny 500 mln dollar bolatyn shetelden ákelingen kólikter bastapqy tirkeýden ótpeıdi. Bul týraly Úkimet otyrysynda QR Ulttyq banki tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Ulttyq bank jeke tulǵalardyń syrtqy ekonomıkalyq operatsııalarynyń jekelegen túrleri boıynsha tólem balansy statıstıkasynyń aýqymyn keńeıtý boıynsha jumys júrgizdi. Atap aıtqanda, jeke tulǵalar sheteldik ınternet-alańdar arqyly satyp alatyn taýarlar ımportyna baǵalaý júrgizildi. 2015 jyldan bergi kezeńde elektrondyq saýda boıynsha taýar ımporty 2,6 mlrd dollarǵa qosymsha esepteldi», - dedi ol.

Onyń atap ótýinshe, Qazaqstan Respýblıkasynyń Biryńǵaı saqtandyrý derekqorynan alynǵan málimetter negizinde jeke tulǵalardyń sheteldik tirkeý nómiri bar jeńil avtokólikterdi ákelýine baǵalaý júrgizilgen.

«Qazaqstan Respýblıkasynda avtomashınalardyń bir bóligi bastapqy tirkeýden ótpeı, tıisinshe, resmı statıstıkada kórsetilmeı qalǵany bar. 2015 jyldan bastap avtomobılderdi ákelý boıynsha esepke alynbaǵan ımporttyń jalpy kólemi konservatıvtik baǵalaý boıynsha 4,2 mlrd dollar nemese orta eseppen jyl saıyn 500 mln dollarǵa jýyq boldy. 2015 jyldan bastap 2022 jyldyń ekinshi toqsany aralyǵyndaǵy kezeńde qosymsha esepteýdiń jıyntyq kólemi 6,8 mlrd dollar boldy. Bul rette 2021 jyly eń kóp qosymsha esepteý boldy, onda ımport 1,7 mlrd dollarǵa túzetilgen. Osylaısha, jeke tulǵalardyń kórsetilgen transshekaralyq operatsııalarynyń syrtqy sektordyń statıstıkasyna qosylýy bıylǵy jyldyń 1-jartyjyldyǵynda saýda balansynyń profıtsıtin 6,6 mlrd dollardan 5,7 mlrd dollarǵa deıin tómendetti. Biraq tólem balansy statıstıkasynyń sapasyn jaqsartty», - dedi UB tóraǵasy.