Jyl saıyn kópbalaly 20 myń áıel jumyspen qamtylady - Eraly Toǵjanov

NUR-SULTAN. QazAqparat – Kópbalaly analarǵa úı jaǵdaıynda tabys tabýǵa múmkindik jasalady. Bul týraly Senatta «Halyq tabysyn arttyrýdyń 2025 jylǵa deıingi baǵdarlamasy» keshendi josparyn iske asyrýdy talqylaý kezinde Premer-Mınıstrdiń orynbasary Eraly Toǵjanov málim etti, dep habarlaıdy QazAqparat tilshisi.

«Sonymen qatar baǵdarlamada halyqtyń áleýmettik az qamtylǵan toptarynyń turaqty tabysyn qalyptastyrý boıynsha keshendi is-sharalar qaralǵan. Atap aıtqanda, kópbalaly, sondaı-aq múgedektigi bar balalardy tárbıelep otyrǵan analarǵa úı jaǵdaıynda tabys tabýǵa múmkindik jasaý eskerilgen. Joba aıasynda áıelder eńbek naryǵynda suranysqa ıe mamandyqtar boıynsha qysqa merzimdi kýrstan ótip, óz isin ashýǵa qatysty tegin konsýltatsııalar alady. Nátıjesinde, jyl saıyn 20 myń áıeldi jumyspen qamtý josparlanǵan», - dedi E. Toǵjanov.

Onyń aıtýynsha, bul jumystardy Analar keńesi úılestiredi jáne óńirlerdegi otbasylardy qoldaý ortalyqtary júrgiziledi.

Sonymen qatar, osy baǵytta múgedektigi bar adamdardy jumyspen qamtý tetikteri jetildiriletin bolady.

Budan buryn habarlanǵandaı, E. Toǵjanov «Samuryq-Qazyna» qory kompanııalar tobyndaǵy óndiris jumysshylarynyń jalaqasy kóteriletinin aıtty.

Ekonomıkanyń túrli salalarynda ınvestıtsııalyq jobalardy iske asyrý esebinen 2025 jylǵa deıin 2 mln-nan astam jańa jumys orny qurylady.