Jyl saıyn elimizdegi astyqtyń tórtten bir bóligi Aqmola oblysynda óndiriledi - ákim

ASTANA. QazAqparat - Agroónerkásip kesheni oblys ekonomıkasynyń perspektıvaly sektorlarynyń biri bolyp qala beredi. Bul týraly Aqmola oblysynyń ákimi Ermek Marjyqpaev ortalyq kommýnıkatsııalar qyzmetinde ótken brıfıngte aıtty, dep habarlaıdy QazAqparat tilshisi.

Aımaq basshysynyń aıtýynsha, oblystyń aýyl sharýashylyǵynyń ónimin óndirýdegi úlesi óńirdiń ǵana emes, Astananyń da qajettilikterin qamtamasyz ete otyryp, shamamen 10 paıyzdy quraıdy.

«Bıyl aýyl sharýashylyǵy daqyldary 5,2 mıllıon gektar alqapqa egildi. Bul - respýblıkadaǵy eń iri astyq tanaby. Jyl saıyn elimizdegi astyqtyń tórtten bir bóligin óndiremiz, bul rette biz astyqqa, tuqymǵa jáne jemge degen ishki qajettilikti tolyq qamtamasyz etemiz. Jyl saıyn alys jáne jaqyn shet elderge 2,2 mıllıon tonnadan astam astyq eksporttalady», - dep atap ótti oblys basshysy.

Óńirde astyq óndirisin tehnıkalyq jaraqtandyrýǵa tıisti kóńil bólinedi.

Jyl basynan beri oblystyń agroqurylymdary 840 aýyl sharýashylyǵy tehnıkasyn satyp aldy: jalpy somasy 29,8 mıllıard teńgege traktor - 143, kombaın - 69, egin egý keshenderi - 34 jáne ózge de tehnıka – 594.

Egin egý naýqanyna barlyǵy 15,1 myń traktor, 16,6 myń astyq sepkish jáne 1,5 myńnan astam ónimdiligi joǵary egistik keshenderi qatysty.