Jyl saıyn elimizde balalarǵa qatysty 2 myńǵa jýyq qylmys jasalady

ASTANA. QazAqparat – Jyl saıyn Qazaqstan aýmaǵynda balalarǵa qatysty 2 myńǵa jýyq qylmys jasalady. Mundaı derekter «Ashyq» NQA portalynda jarııalanǵan Qoǵammen áriptestikte qoǵamdyq qaýipsizdikti qamtamasyz etýdiń 2024-2028 jyldarǵa arnalǵan tujyrymdamasynda keltirilgen, dep habarlaıdy QazAqparat tilshisi.

Vedomstvo qujattyń kirispesinde tujyrymdamany qabyldaýdyń mańyzdylyǵyna toqtalǵan. Onda qazirgi krımınogendik ahýalǵa taldaý jasalǵan.

QR Іshki ister mınıstrliginiń dereginshe, balalardyń qaýipsizdigine qatysty máseleler júıeli sheshimdi qajet etedi.

«Balalar qorǵaýdy qajet etetin eń osal top bolyp qala beredi. Olarǵa qatysty jyl saıyn 2 myńǵa jýyq qylmys jasalady. Olardyń ishinde kámeletke tolmaǵandarǵa qatysty 700-den astam jynystyq qylmys bar. Olardyń 70%-dan astamyn aınalasyndaǵylar jasaǵan», - dep jazylǵan ashyq talqylaýǵa shyǵarylǵan qujatta.

Sonymen birge, tujyrymdamada byltyr elimizde tirkelgen qylmystyq quqyqbuzýshylyqtardan 495,1 mlrd teńge shyǵyn kelgeni jazylǵan.

Osy jáne ózge de máselelerdi júıeli sheshý úshin mınıstrlik 4 jyldyq tujyrymdamany qabyldaýdy usynady.