Jyl saıyn bala tárbıesine nemquraıly qaraǵan 1 myń turǵyn ata-ana quqyǵynan aıyrylady
BAQ ókilderiniń qatysýymen ótken brıfıngide QR ІІM Ákimshilik polıtsııa komıteti tóraǵasynyń mindetin atqarýshy Qaısar Sultanbaev osylaı málimdedi, dep habarlaıdy QazAqparat tilshisi.
«Bıyl kámeletke tolmaǵandardy beıimdeý ortalyqtaryna 4 myńnan astam jasóspirim jetkizildi. Onyń ishinde 3,5 myńnan astamy qaraýsyz jáne panasyz qalǵandar. Jyl saıyn 6 myńnan astam zańdy ókilder bala tárbıesi jónindegi mindetterin oryndamaǵany úshin jaýapqa tartylady. Polıtsııanyń usynysy boıynsha sot jyl saıyn bala tárbıesi boıynsha talaptardy oryndamaǵany úshin 1 myńǵa jýyq ata-ana quqyqtarynan aıyrylady jáne shekteledi», - dep málim etti Qaısar Sultanbaev.
Onyń aıtýynsha, quqyq qorǵaý organdarynyń turaqty esebinde turǵan 4,3 myń jasóspirim men 7 myńǵa jýyq áleýmettik jaǵdaıy nashar otbasynyń balalary bar. Polıtsııa qyzmetkerleri olarmen jeke profılaktıkalyq jumystar júrgizýde.
Osyǵan deıin balasyn túnde oıyn-saýyq oryndaryna jibergen 78 myń ata-ana jaýapqa tartylǵanyn jazdyq.
Ashyq kózderden alynǵan foto