Jyl saıyn 5 myń shaqyrym jergilikti jol jóndeledi
10:10, 03 Qyrkúıek 2019
NUR-SULTAN. QazAqparat - Jyl saıyn 5 myń shaqyrym jergilikti jol jóndeledi. Bul týraly QR Premer-Mınıstriniń orynbasary Jeńis Qasymbek aıtty, dep habarlaıdy QazAqparat tilshisi.
«Avtojol salasynda qazirgi ýaqytta »Nurly jol« memlekettik baǵdarlamasyn 2025 jylǵa deıin uzartý jumystary aıaqtalýda. Baǵdarlama aıasynda eldiń biryńǵaı kólik júıesi qalyptasady», - dedi ol búgin Memleket basshysynyń Qazaqstan halqyna Joldaýyn talqylaýǵa arnalǵan Úkimet otyrysynda.
Onyń atap ótýinshe, óńiraralyq ınfraqurylymdy júıeli damytý úshin jergilikti jerlerdegi avtojoldardy qarjylandyrýǵa jyl saıyn parıtettik negizde 200 mlrd teńge bólinedi.
«Bul jergilikti avtomobıl joldarynyń jaı-kúıiniń jaqsy jáne qanaǵattanarlyq jaǵdaıyn 2025 jylǵa qaraı 68 paıyzdan 95 paıyzǵa deıin jetkizip, jyl saıyn 5 myń shaqyrymnan astam joldy jóndeý jumystarymen qamtýǵa múmkindik beredi», - dedi Jeńis Qasymbek.