Jyl saıyn 40 myńnan astam adamnan qaterli isik tabylady

ALMATY. QazAqparat - Elimizde jyl saıyn 13 myńǵa jýyq adam qaterli isik aýrýynan kóz jumady. Jylyna 40 myńnan astam turǵynnan onkologııalyq dert anyqtalady. Onyń 5 myńy - sút bezi, 4 myńǵa jýyǵy - ókpe ragy. Bul týraly Almatyda ótip jatqan Best of ASCO Kazakhstan-2023 onkologtar sammıtinde aıtyldy, dep habarlaıdy QazAqparat tilshisi.

Sammıtke 7 elden mamandar keldi.

Halyqaralyq jáne otandyq sarapshylar onkologııalyq aýrýdy emdeý dıagnostıkasynyń jańa tásilderin talqylady.

Sondaı-aq, naýqastardyń ómirin uzartýǵa septigin tıgizetin medıtsınalyq preparattardy tanystyrdy.

«Úsh aı saıyn jańa dári-dármek shyǵyp jatyr. Sebebi, farmakologııa jaǵynan kóptegen ımmýnmonkologııalyq dáriler shyqty. Targettik preparattar, solardy emdeý úderisine qosý úshin osyndaı úlken kongrester qajet. Eki kún boıy bizge sút bezi ragy jáne ókpe ragy boıynsha kóptegen zamanaýı aqparattar beriledi. Sol jańashyldyqty óńirdegi áriptesterimiz emdik protsesterge engizýi kerek»,- deıdi Qazaq onkologııa jáne radıologııa ǴZI basshysynyń orynbasary Baqytjan Ońǵarbaev.

Aıtýynsha, sońǵy ýaqytta atalǵan aýrý jas talǵamaı barady.

«Buryn egde jastaǵy adamdar shaldyqsa, qazir 45-50 jastaǵylarda jıi kezdesedi»,-dedi ol.