Jyl saıyn 30-dan astam adam gazdan ýlanyp kóz jumady

ASTANA. QazAqparat – Gazdy durys paıdalanbaýdyń kesirinen jyl saıyn 30-dan astam adam ýlanyp kóz jumady. Tótenshe jaǵdaı mınıstriniń orynbasary Marat Kúldikov Ortalyq kommýnıkatsııalar qyzmetinde ótken brıfıngide osyndaı derek keltirdi, dep habarlaıdy QazAqparat tilshisi.

«Jylý berý kezeńindegi kúrdeli máseleniń biri – turmystyq gazdy paıdalaný. Kóbinese, bir páterde gaz ballonyn durys paıdalanbaý jáne ony saqtaý kórshi páterdegi adamdarǵa qaýip tóndiredi. Qoldaǵy málimetterge súıensek, jyl saıyn el aýmaǵynda tabıǵı jáne suıytylǵan gazben ýlanýdyń saldarynan 30-dan astam adam qaıtys bolady. Al gaz ballon jarylǵan kezde bir top adamnyń ólimine ákelip soǵady», -dedi Marat Kúldikov.

Aıtýynsha, azamattardyń eskirgen jáne jaramdylyq merzimi ótip ketken ballondardy paıdalanýy jaǵdaıdy qıyndatyp otyr.

«Tutynýshylardyń kópshiligi, ádette, ballondaryn jaqyn mańdaǵy janarmaı quıý beketterinde toltyrady. Alaıda, zańǵa sáıkes janarmaı quıý beketterinde turmystyq ballondardy toltyrýǵa tyıym salynady, bul gazben jabdyqtaý júıeleriniń qaýipsizdik talaptaryn buzý bolyp tabylady», - dedi vıtse-mınıstr.