Jyl saıyn 3 myńnan astam qandas Qazaqstan ýnıversıtetterinde tegin oqýǵa múmkindik alady

ASTANA. QazAqparat - Qandas jastar Qazaqstannyń joǵary oqý oryndarynda tegin oqýy úshin memleket tarapynan 4 paıyz kvota belgilengen. Jyl saıyn 3 myńnan astam sheteldegi qazaq balasy tarıhı otanynda oqý múmkindigine ıe bolady, dep habarlaıdy QazAqparat.

Qazirgi tańda osy kvotamen Qazaqstanda bilim alyp jatqan 6,5 myńnan astam qandas bar.

Osyǵan oraı M.S.Nárikbaev atyndaǵy KAZGıÝÝ ýnıversıteti men «Otandastar qory» kommertsııalyq emes aktsıonerlik qoǵamy yntymaqtastyq týraly memorandýmǵa qol qoıdy.

Ekijaqty kezdesýge ýnıversıtet basshylyǵy Talǵat Nárikbaev pen «Otandastar qory» prezıdenti Abzal Saparbekuly qatysty.

Kezdesý barysynda «Otandastar qory» uıymynyń prezıdenti Abzal Saparbekuly uıymnyń qyzmetimen tanystyryp, jalpy sheteldegi etnıkalyq qazaqtardyń jaǵdaıyna qysqasha toqtaldy.

«Jalpy syrtta 6 mıllıonnan astam etnıkalyq qazaq turyp jatyr. Olardyń basym kópshiligi ózimizge kórshiles aımaqtarda», - dedi Abzal Saparbekuly.

Osy memorandým aıasynda elimizde bilim alyp jatqan qandastarymyzdyń arasynda ýnıversıtettiń jastar lıgasymen jumys isteý boıynsha birikken is-sharalar jospary qabyldandy.