Jyl saıyn 20 myńǵa jýyq adam Qazaqstan azamattyǵyn alýǵa ótinish beredi

ASTANA. QazAqparat – Jyl saıyn 20 myńǵa jýyq adam organdarǵa Qazaqstan azamattyǵyn alý máselesi boıynsha júginedi. Іshki ister mınıstrliginde ótken brıfıngide vedomstvo ókili Shuǵyla Turlybek osylaı málim etti, dep habarlaıdy QazAqparat tilshisi

«Táýelsizdik jyldary 1 mıllıonnan astam adam Qazaqstan azamattyǵyn aldy. Al ótken jyly 22 myń adam, onyń ishinde QR Prezıdentiniń Jarlyǵymen – 1 375, jeńildetilgen tártippen - 20 myńnan astam adam azamattyq aldy. Onyń ishinde 17,6 myńnan astamy qandas mártebesin aldy. Al 1 287-i Qazaqstan, Belarýs, Qyrǵyzstan jáne Reseı arasyndaǵy azamattyqqa qabyldaýdyń jeńildetilgen tártibi týraly kelisim boıynsha, taǵy 1 777-i turmysqa shyqqan áıeldiń azamattyǵy týraly konventsııa boıynsha azamattyq aldy», - deıdi Shuǵyla Turlybek.

Mınıstrlik BUU-nyń Qazaqstandaǵy ókildigimen birlesip, 2 jyl ishinde qujaty joq jáne azamattyǵy belgisiz adamdardy anyqtaý jáne tirkeý boıynsha keń aýqymdy aktsııa ótkizgen.

Onyń nátıjesinde 8 myńnan astam adam anyqtalypty.

Onyń ishinde 5 myń adam Qazaqstan azamaty ekenin rastap, kýálik rásimdese, 3 myńnan astamyna azamattyǵy joq tulǵanyń kýáligi berilgen.