Jyl saıyn 2 myńnan astam adam jol-kólik oqıǵasynan qaıtys bolady

ASTANA. QazAqparat – Jyl saıyn 13 myńnan astam jol-kólik oqıǵasy tirkelip, 2 myńnan astam adam qaza tabady. Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova ortalyq kommýnıkatsııalar qyzmetinde ótken brıfıngide osyndaı derek keltirdi, dep habarlaıdy QazAqparat tilshisi.

«Jyl saıyn 13 myńnan astam jol-kólik oqıǵasy tirkeledi. Saldarynan 2 myńnan astam adam qaza taýyp, 18 myńnan astam adam jaraqat alady.

Jalpy, keıingi 5 jylda apattylyqtyń tómendeý dınamıkasy baıqalady.

Bıyl 1 700-den astam jol-kólik oqıǵasy bolyp, 200-den astam adam qaza taýyp, 2,5 myńǵa jýyq adam jaralandy», - dedi aǵa ınspektor.

Onyń málimetine sensek, apattardyń negizgi sebebi – kólik júrgizý tártibiniń tómendigi.

«Qarapaıym erejelerdi saqtaý joldardaǵy apattardy azaıtýǵa kómektesedi. Árbir jol qozǵalysyna qatysýshynyń tártibi – bizdiń qorshaǵan ortanyń qaýipsizdiginiń kepili! Jol qaýipsizdigi jaıaý adamǵa da, kólik júrgizýshige de baılanysty. Keıbireýler tipti, joldy kesip óterde jan-jaǵyna qaraý kerek ekenin umytyp ketedi, sebebi burylystan kútpegen jerden kólik paıda bolýy múmkin. Al, túnde barlyq júrgizýshiler jaıaý júrgenderdi baıqaı almaıdy, óıtkeni adamdar kıimderinde shaǵylystyratyn elementterdi sırek paıdalanady. Sondyqtan, óte saq bolý kerek jáne júrgizýshiler sizdi ótýge múmkindik beretinine kóz jetkizý kerek», - dedi Aqtoty Boranova.