Jyl saıyn 14 jasqa tolmaǵan balalar arasynda 200 myń jazataıym oqıǵa tirkeledi - mınıstrlik

ASTANA. QazAqparat – Jyl saıyn respýblıkada 14 jasqa deıingi balalar arasynda 200 myńǵa deıin jazataıym oqıǵalar men jaraqattar tirkeledi. Bul týraly «Ashyq» NQA portalynda jarııalanǵan 2030 jylǵa deıin ana men bala densaýlyǵyn saqtaý qyzmetin damytý tujyrymdamasynda jazylǵan, dep habarlaıdy QazAqparat tilshisi.

«Jyl saıyn respýblıkada 14 jasqa deıingi balalar arasynda 200 myńǵa deıin jazataıym oqıǵalar men jaraqattar tirkeledi. Onyń 1,2%-y múgedektikke ákeledi. Balalardyń jaraqattar men jazataıym oqıǵalardan qaıtys bolý jaǵdaılarynyń jartysyna jýyǵy termııalyq jáne hımııalyq kúıik – 54%, mehanıkalyq asfıksııa - 26% jáne 20%-y jol-kólik jaraqattary, kezdeısoq qulaý jáne taǵy da basqaralary», - dep jazylǵan Densaýlyq saqtaý mınıstrligi usynǵan aqparatta.

Vedomstvo dereginshe, elektr samokattardy paıdalaný keń taralǵannan bastap, jol-kólik oqıǵalarynan zardap shekken balalar sany da ósken. Máselen, byltyr kámeletke tolmaǵandardyń qatysýmen bolǵan mundaı apattar 2021 jylmen salystyrǵanda 15%-ǵa artqan.

«Qazaqstanda 14 jasqa deıingi balalar óliminiń mańyzy boıynsha ekinshi syrtqy faktor - ol balalardyń sýǵa ketýi. 3 000 ata-ana arasynda iriktep júrgizilgen zertteý balalardyń shamamen jartysy sýda bolǵan kezde qaýipsizdik quraldaryn qoldanbaıtynyn kórsetti», - delingen tujyrymdamada.

Qosa ketsek, Densaýlyq saqtaý mınıstrligi aldaǵy 7 jylǵa arnalǵan Ana men bala densaýlyǵyn saqtaý qyzmetin damytý tujyrymdamasy ázirlep, qujatty ashyq talqylaýǵa shyǵardy.