Jyl basynan qurylys salasynda JІÓ 6 paıyzǵa ósimi baıqaldy - UEM
Bul týraly Májiliste «Nurly jol» baǵdarlamasyn iske asyrý sheńberinde jalǵa beriletin turǵyn úı qurylysynyń barysy men turǵyn úı ınfraqurylymyn nyǵaıtý sharalary» atty dóńgelek ústelde Ulttyq ekonomıka vıtse-mınıstri Roman Sklıar málimdegen bolatyn.
«Jahandyq daǵdarys saldarynan bolatyn kúrdeli ekonomıkalyq jaǵdaıǵa qaramastan, sonymen qatar, elimizdegi ekonomıkanyń kóptegen salalarynda kórsetkishterdiń tómendeýine qaramastan - qurylys salasy qarqynyn báseńdetken emes, berilip jatqan baspanalar kólemi joǵary. Aldyn ala málimetter boıynsha, azamattyq jáne ónerkásiptik qurylys salasyn yntalandyrýdyń arqasynda 2016 jyldyń birinshi toqsanynda qurylys salasyndaǵy jalpy ishki ónimniń úlesi 6 paıyzǵa ósip otyrǵany baıqalady», - dedi R. Sklıar.
Vıtse-mınıstrdiń aıtýynsha, 2015 jyldyń qorytyndysy boıynsha elimizde 8,9 mln. sharshy metr baspana paıdalanýǵa berilgen, bul 2014 jylmen salystyrǵanda 119% artyq. Onyń ishinde memlekettik kásiporyndar men uıymdar tarapynan salynǵan baspana 1,45 mln sharshy metrdi qurady, bul respýblıka boıynsha paıdalanýǵa berilgen baspanalardyń 16,3% teń. Al jeke menshiktegi kásiporyndar men uıymdar, sonymen qatar, halyqtyń óz tarapynan salynǵan baspanalar kólemi 7,4 mln sharshy metrdi qurap otyr. Bul respýblıka boıynsha jalpy paıdalanýǵa berilgen baspanalardyń 83,7 paıyzyna teń.