Jyl basynan kópbalaly analar 191,6 mlrd teńge kóleminde járdemaqy aldy
«Qazan aıynda osy járdemaqy túrin jalpy somasy 20,5 mlrd teńgege 388,1 myń otbasy aldy. Atalǵan memlekettik járdemaqyǵa 4 jáne odan artyq birge turatyn kámeletke tolmaǵan nemese kúndizgi bólimde oqıtyn 23 jasqa deıingi stýdent balalary bar otbasylar tabysyna qaramastan úmitker bola alady. Tólem mólsheri balalardyń sanyna baılanysty 44 532 teńgeden (4 bala) 77 951 teńgege (7 bala) deıin, 8 jáne odan keıingi ár balaǵa 4 AEK-ten saralanǵan», - delingen Eńbek mınıstrligi baspasóz qyzmetiniń málimetinde.
Atap aıtqanda, 8 balasy bar otbasy úshin járdemaqy 88 896 teńgeni quraıdy, 9 balaǵa – 100 008 teńge, 10 balaǵa – 111 120 teńge, 11 balaǵa - 122 232 teńge, 12 balaǵa – 133 344 teńge, 13 balaǵa – 144 456 teńge, 14 balaǵa – 155 568 teńge, 15 balaǵa - 166 680 teńge, 16 balaǵa – 177 792 teńge tólenedi.
Eske sala keteıik, Qazaqstandaǵy kópbalaly otbasylarǵa olardyń kiristerin esepke almaı beriletin jańa memlekettik járdemaqy 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde qarastyrylǵan tabysy az jáne kópbalaly otbasylardy qoldaýdyń úsh negizgi baǵyty aıasynda engizildi.
2020 jylǵy 13 mamyrda Memleket basshysy 8 jáne odan da kóp balasy bar otbasylar úshin jekelegen mólsherlerdi belgileý arqyly osy járdemaqyny keńeıtýdi qamtamasyz etetin zańǵa qol qoıdy.