Jyl basynan esirtkini ınternet arqyly satýdyń 153 faktisi anyqtaldy - ІІM

NUR-SULTAN. QazAqparat – Jyl basynan esirtkini ınternet arqyly satýdyń 153 faktisi anyqtaldy. Bul týraly QR Іshki ister mınıstrligi Esirtki qylmysyna qarsy is-qımyl departamenti basqarmasynyń bastyǵy Baqytjan Ámirhanov aıtty, dep habarlaıdy QazAqparat tilshisi.

«Kezinde aýǵan geroıni beleń alyp turǵan kezde ol qolma-qol satylatyn. Al búgingi tańda ınternet-resýrstar arqyly saýdalanady. Satýshy men alýshy bir-birin kórmeıdi, tanymaıdy. Internet-resýrstardy paıdalanady. Sondyqtan arnaıy tarmaq engizdik. Munan bólek, jarnama, nasıhattaý degen baptar engizilip otyr. Jyl basynan beri ishki ister organdary esirtkini ınternet arqyly satýdyń 153 faktisin, jarnamalaýdyń 79 faktisin tirkedi», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, esirtki zattarynyń qylmystyq mólsheri bolady. Búginde esirtkiniń 1 gramynan bastap qylmystyq jaýapkershilik kózdelgen. Al 1 grammnan az bolsa, quqyq buzýshylyqqa tartý qarastyrylǵan.

Sonymen qatar basqarma basshysy elimizdiń ońtústik óńirlerindegi esirtki ósiretin alańdardy anyqtaý tikushaq, ushqyshsyz apparattar jáne «Qazǵaryshtyń» jerdi spýtnık arqyly qashyqtan zondtaýy arqyly júrgiziletinin atap ótti.

«Bıyl 20-ǵa jýyq plantatsııa anyqtadyq. Úndi qarasorasyn ósirýge Qyzylorda oblysynyń jáne oǵan shektes óńirlerdiń aýa raıy óte qolaıly. Soranyń quramyndaǵy tetragıdrokannabınoldyń aǵzaǵa áseri óte kúshti bolady. Sondyqtan naryqta baǵalanady», - dedi Baqytjan Ámirhanov.