Jyl basynan esirtki saýdasyna qatysty 17 stýdent ustaldy

NUR-SULTAN. QazAqparat – Bıylǵy 7 aıda el boınsha 4,2 myń esirtki qylmysy tirkelgen. Bul ótken jyldyń sáıkes kezeńimen salystyrǵanda 10,9 paıyzǵa az, dep habarlaıdy QazAqparat tilshisi Ranking resýrsyna silteme jasap.

Ranking dereginshe, esirtkini zańsyz daıyndaý, qaıta óńdeý, satyp alý, saqtaý jáne tasymaldaý qylmystary kóp tirkelgen. Bul baǵytta 1,1 myń zańsyzdyq anyqtalǵan. Sonymen qatar bıyl quramynda esirtki zattary bar jáne tyıym salynǵan ósimdikterdi ósirý faktileri jıilegen. Mundaı 193 jaǵdaı tirkelgen. Bul ótken jylǵa qaraǵanda 7,8 paıyzǵa kóp.

Óńirler arasynda esirtki qylmysy boıynsha elorda kósh basynda tur. Munda 7 aı ishinde 444 fakti anyqtalǵan. Odan keıin Almaty qalasy men (382 qylmys) jáne Jambyl oblysy (352 qylmys) ornalasqan.

Málim etilgendeı, esirtki qylmysyna baratyn azamattardyń kóbi – jumyssyzdar. Bıyl mundaı sanattaǵy 2 myńǵa jýyq adam anyqtalǵan. Al esirtki tutynǵan, daıyndaǵan nemese ony satqandar arasynda 206 adamnyń jumysy bar bolsa, 17-si oqý oryndarynda bilim alady, 12-si jeke kásipker jáne tórteýi memlekettik qyzmetshi bolǵan.

Eske sala keteıik, buǵan deıin Abaı oblysynda asa iri kólemdegi sıntetıkalyq esirtkimen úsh stýdent ustalǵanyn habarlaǵan bolatynbyz.