Jyl basynan elimizdiń aýmaǵynda 2 tonna esirtki tárkilendi

NUR-SULTAN. QazAqparat – Jyl basynan beri elimizdiń aýmaǵynda 3,5 myń esirtki qylmysy áshkere boldy. Bul týraly QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.

«26 maýsymda kóptegen elde áleýmettik sıpattaǵy qubylysqa aınalǵan nashaqorlyqqa qarsy kúrestiń halyqaralyq kúni atap ótildi. Qazaqstan nashaqorlyq pen esirtki bıznesine qarsy is-qımyldyń jalpy álemdik júıesimen birikken. Ulttyq esirtkige qarsy zańnama halyqaralyq standarttarǵa sáıkes keltirildi – BUU-nyń esirtki jónindegi negizgi úsh Konventsııasy da ratıfıkatsııalandy. Іshki ister mınıstrliginiń negizgi kúsh-jigeri esirtkini jetkizýshilermen jáne satýshylarmen kúresýge, olardyń taralý arnalaryn jabý jáne iri esirtki satýshylardy áshkereleýge baǵyttalǵan», - dedi ol.

Resmı ókildiń dereginshe, jyl basynan beri ІІM 3,5 myń esirtki qylmysyn, onyń ishinde 758 ótkizý faktisin anyqtady. 2 tonnaǵa jýyq esirtki tárkilendi, onyń ishinde 41 keli sıntetıkalyq esirtki bar. Uıymdasqan qylmystyq esirtki toptarynyń 3 kóshbasshysy men 30 qatysýshysy qylmystyq jaýapkershilikke tartyldy. Esirtki taratatyn 740 saıt buǵattalyp, 10 esirtki zerthanasy joıyldy.

«Profılaktıkalyq sıpattaǵy sharalar kesheni mańyzdy baǵyt bolyp sanalady. Oqý oryndarynda esirtkige beıim topqa kiretin jasóspirimderdi erte anyqtaýdyń jáne olarmen jumys isteýdiń zamanaýı ádisteri engizilýde. Qazir biz nashaqorlyqtyń bastapqy aldyn alý máseleleri boıynsha 60-tan astam ÚEU-men belsendi yntymaqtastyqta jumys jasaımyz. Jalpy qoǵam osy qylmys túrine qarsy toptasyp, birlesken jumystar júrgizgende ǵana qazirgi zamannyń jahandyq problemasy - nashaqorlyqty sheshýde nátıjelerge qol jetkizýge bolady», - dedi Nurdildá Oraz.