Jyl basynan beri Túrkııa men Qazaqstan arasyndaǵy saýda aınalymy 3,6 mlrd dollarǵa jetti

ASTANA. QazAqparat – Bıyl 7 aıda Qazaqstan men Túrkııa arasyndaǵy saýda aınalymy 3,6 mlrd dollarǵa jetti. Bul týraly elimizge resmı saparmen kelgen Túrkııanyń Syrtqy ister mınıstri Hakan Fıdanmen kezdesken QR Syrtqy ister mınıstri Murat Nurtileý málim etti, dep habarlaıdy QazAqparat tilshisi.

«Ekijaqtyq baılanystardyń ózegi – saýda-ekonomıkalyq yntymaqtastyq. Túrkııa Respýblıkasy – Qazaqstannyń tórtinshi oryndaǵy saýda áriptesi. Ótken jyly taýar aınalymynyń kólemi 6,3 mlrd dollarǵa jetse, osy jyldyń 7 aıynda bul kórsetkish 3,6 mlrd dollardy qurady. Aldaǵy meje – osy alǵan ekpindi joǵaltpaı, taýar aınalymyn arttyrý», - dep toqtaldy Murat Nurtileý.

Sonymen qatar, vedomstvo basshysy qarashada Túrkistan qalasynda ótetin Túrki memleketteriniń mereıtoılyq 10-shy sammıtine qatysý úshin Túrkııa Prezıdenti Rejep Taııp Erdoǵan keletinin atap ótti.

Qosa ketsek, buǵan deıin Qazaqstan men Túrkııa arasynda kedendik baqylaý rásimderi jeńildeıtinin jazyp edik.

Sonymen qatar, Qazaqstannyń Túrkııaǵa qandaı taýarlardy eksportqa shyǵaratynyn habarlaǵan bolatynbyz.