Jyl basynan beri teńgeniń dollarǵa qatysty baǵamy 2%-ǵa nyǵaıdy – Ulttyq bank
«Jyl basynan bastap sáýir aıynyń sońyna deıin teńgeniń dollarǵa qatysty baǵamy 1 dollar úshin 453,21 teńgege deıin, ıaǵnı 2%-ǵa nyǵaıdy. Ulttyq Bank valıýtalyq ınterventsııalar júrgizgen joq. Ulttyq valıýtanyń nyǵaıýy «salyq kezeńi» faktoryna jáne sheteldik ınvestorlardyń Qazaqstannyń memlekettik baǵaly qaǵazdar naryǵyna kirýimen baılanysty boldy. Beırezıdentterge tıesili salymdardyń kólemi jyl basynan beri 126 mlrd teńgege ulǵaıdy», - dedi UB tóraǵasynyń orynbasary.
Vıtalıı Týtýshkın aıtýynsha, teńgeniń nyǵaıýyna negizgi eki faktor áser etti.
«Birinshiden, QR memlekettik baǵaly qaǵazdaryna sheteldik ınvestorlardyń aǵyny baıqalady. Ekinshiden, qańtar-sáýir aılarynda kvazımemlekettik sektor sýbektileriniń 1,3 mlrd AQSh dollary somasyna valıýtalyq túsimdi satýy jáne Ulttyq qordan respýblıkalyq bıýdjetke 2,1 mlrd dollar mólsherinde transfertterdi qamtamasyz etý úshin valıýtany satýy teńgege qoldaý kórsetti», - dep toqtaldy Vıtalıı Týtýshkın.
Buǵan qosa, ol Qazaqstandaǵy ınflıatsııa deńgeıi 16,8%-ǵa deıin baıaýlaǵanyn atap ótti.