Jyl basynan beri qazaqstandyqtarǵa 1,5 trln teńgeden astam somaǵa zeınetaqy tólendi
2021 jyldyń qańtar-shilde aılarynda respýblıkalyq bıýdjetten bazalyq zeınetaqy tóleýge 478, 9 mlrd teńgeden astam qarjy, yntymaqty zeınetaqy tólemderine 1 083 mlrd teńge baǵyttaldy.
2021 jyldyń shilde aıynda respýblıkalyq bıýdjetten zeınetaqy tólemderine 222,2 mlrd teńge, onyń ishinde bazalyq zeınetaqy tóleýge – 68,1 mlrd teńge, yntymaqty zeınetaqy tóleýge – 154,1mlrd teńge bólindi.
2021 jyldyń 1 tamyzyndaǵy jaǵdaı boıynsha zeınetkerler sany 2 mln 238 myń adamdy quraıdy.
Zeınetaqy tólemderiniń ortasha mólsheri (onyń ishinde bazalyq zeınetaqyny qosqanda) 2021 jyldyń 1 tamyzyndaǵy jaǵdaı boıynsha 99 921 teńgeni qurady.
Eske salaıyq, 2018 jylǵy 1 shildeden bastap memlekettik bazalyq zeınetaqy tólemi ár alýshyǵa onyń zeınetaqy júıesindegi tájirıbesin eskere otyryp, jeke taǵaıyndalady.
Bul rette zeınetaqy júıesindegi eńbek ótiline 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder qosylady.
Sonymen, eger zeınetaqy júıesindegi jumys ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54%-yn quraıdy, sodan keıin 10 jyldan asqan ár jyl úshin onyń mólsheri 2%-ǵa artady. Mysaly, eger siz 20 jyl qatyssańyz, bazalyq zeınetaqy kúnkóris deńgeıi qunynyń 74%-yn, 30 jylda kúnkóris qunynyń 94%-yn quraıdy. 33 jáne odan da kóp jyl jumys ótili bolsa, kúnkóris deńgeıiniń 100%-y mólsherinde joǵary belgilenedi.
Eger bir aı ishinde Biryńǵaı jınaqtaýshy zeınetaqy qoryna MZJ birneshe ret jasalsa, jınaqtaýshy júıege qatysý merzimi bir aıdy quraıdy.
Osylaısha, mindetti zeınetaqy jarnalary neǵurlym turaqty jáne tolyq salynatyn bolsa, zeınetaqy jasyna jetkende bazalyq zeınetaqy tólemderiniń mólsheri soǵurlym kóp bolady.
Óz kezeginde, jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńde alynǵan ortasha aılyq tabysqa baılanysty bolady.