Jyl basynan beri Qazaqstanda qansha kólik urlanǵany belgili boldy

NUR-SULTAN. QazAqparat – Bıyl Qazaqstan aýmaǵynda 245 kólik urlyǵy tirkeldi. Bul týraly QR Іshki ister mınıstrliginen málim boldy, dep habarlaıdy QazAqparat tilshisi.

«Jyl basynan beri 245 kólik urlyǵy tirkelip, sonyń 158-i boıynsha qylmystyń beti ashyldy. Bul ister sotqa joldandy. Osy urlanǵan kólikterdiń 94-i ıelerine qaıtaryldy», - delingen vedomstvonyń QazAqparat agenttigine bergen málimetinde.

Sonymen qatar, mınıstrlik urlanǵan kólikterdi kórshiles elderden Qazaqstan aýmaǵyna kirgizý áreketterine qatysty suraqqa jaýap berdi.

«Ondaı faktiler, árıne, az kezdespeıdi. Bıyldyń basynan qazirgi ýaqytqa deıin elimizde kórshiles memleketterde urlanǵan avtokólikterdiń 32-si anyqtaldy. Olardyń bári tárkilenip alyndy», - dep atalyp ótken Іshki ister mınıstrliginiń derekterinde.