Jyl basynan beri Qazaqstanda kámeletke tolmaǵan 98 bala ózine qol saldy

ASTANA. QazAqparat - Jyl basynan beri Qazaqstanda kámeletke tolmaǵan 100-ge jýyq bala óz-ózine qol jumsap, ajal qushty. QazAqparat agenttiginiń resmı saýalyna QR Bas prokýratýrasy osy málimetti keltirdi.

«Bıylǵy jyldyń 6 aıynda kámeletke tolmaǵandar arasynda sýıtsıd oqıǵalary tómendedi (2013 jyldyń 6 aıynda 131 oqıǵa). Aǵymdaǵy jyly bundaı 98 oqıǵa tirkeldi. Sonymen qatar sýıtsıd jasaýǵa talpynǵandar sany azaıdy, ıaǵnı óz-ózine qol jumsaýǵa áreket etýdiń 255 jaǵdaıy anyqtaldy (319)»,-delingen habarlamada.

Osy oraıda Bas prokýratýra balalar arasynda sýıtsıdtiń aldyn alý sharalary aıasynda olardyń otbasylaryndaǵy psıhologııalyq ahýaldy nazardan tys qaldyrmaý kerektigin alǵa tartýda.

«Ata-ana tarapynan tıisti deńgeıde kóńil bólinbeýi, onyń ishinde qıyndyqqa tap bolǵan balaǵa nazar aýdarylmaýdyń saldary, keıbir kezderde kámeletke tolmaǵandarda sýıtsıdtik minez-qulyqtyń paıda bolýyna sebep bolyp jatady. Osy oraıda birinshi kezekte ókiletti organdardyń nazary ata-analardyń balamen ózara qarym-qatynasyn durys qurýdaǵy saýattylyǵyn arttyrý máselesine aýdarylady»,-deıdi vedomstvodaǵylar.

Belgili bolǵandaı, kámeletke tolmaǵandar arasynda sýıtsıdtik qadamdardyń aldyn alý úshin memlekettik organdar arnaıy sharalardy daıarlap shyǵardy. 2012 jyldyń sáýirinde 2012-2013 jyldarǵa arnalǵan sýıtsıdtterdi eskertý boıynsha vedomstvoaralyq is-qımyl jospary qabyldandy.