Jyl basynan beri Qazaqstan men Qytaı arasyndaǵy júk aınalymy 30%-dan artqan

ALMATY. QazAqparat – Ótken jyly Qazaqstan men Qytaı arasyndaǵy júk aınalymy eń joǵary deńgeıge jetti. Bul týraly Almatyda ótken kólik-logıstıka áleýetin damytý jónindegi bıznes-konferentsııada «Qazaqstan temir joly» ulttyq kompanııasy tóraǵasynyń orynbasary Erlan Qoıshybaev aıtty, dep habarlaıdy QazAqparat tilshisi.

Erlan Qoıshybaevtyń aıtýynsha, sońǵy bes jylda konteınerlik tranzıt úsh esege ósip, 1 mln-nan astam jıyrma fýttyq ekvıvalentke (JFE) jetken. Negizgi ósim Qytaı – Eýropa – Qytaı baǵytynda boldy.

«2022 jyly Qazaqstan men Qytaı arasyndaǵy júk aınalymy tarıhta alǵash ret eń joǵary deńgeıge – 23 mln-nan astam tonnaǵa jetti. Bıyl da ósý qarqyny saqtalýda. Alǵashqy úsh aıda eki el arasyndaǵy júk aınalymy 30% - dan artty. Eger Qazaqstannyń Qytaıǵa jóneltilgen jeke eksportyn aıtar bolsaq, ol birinshi toqsanda 53%-ǵa ósti. Biz júk aınalymynyń ary qaraıǵy ósý áleýetin baıqap otyrmyz, osy baǵytta qarqyndy jumys isteıtin bolamyz», - dedi QTJ tóraǵasynyń orynbasary.

QTJ baspasóz qyzmetiniń málimetinshe, bıylǵy jyldyń birinshi toqsanynda júkti tranzıttik tasymaldaý kólemi 2022 jyldyń uqsas kórsetkishinen 35% ese ósip, 7,2 mln tonnany qurady. Onyń ishinde konteınerlik tasymal 19%-ǵa ósip, 313 myń JFE-ge jetti.