Jyl basynan beri KASE-degi saýda-sattyq kólemi 15 paıyzǵa ósti

ALMATY. QazAqparat- 2023 jyldyń birinshi jartyjyldyǵynda Qazaqstan qor bırjasyndaǵy jalpy saýda-sattyq kólemi byltyrǵy sáıkes kezeńmen salystyrǵanda 15,2 %-ǵa nemese 20,8 trln teńgege ósipti, 157,7 trln teńgege jetti, dep habarlaıdy QazAqparat tilshisi.

«KASE-degi saýda-sattyqtyń jıyntyq kólemi 157,7 trln teńgeni qurap, 2022 jyldyń sáıkes kezeńimen salystyrǵanda 15,2 %-ǵa nemese 20,8 trln teńgege ósti. Indeksiniń máni 10,9 %-ǵa 3 604,75 tarmaqqa deıin ósti»,- dep habarlady Qazaqstan qor bırjasynan.

Qor bırjasynyń málimetinshe, saýda-sattyqtyń eń kóp kólemi «QazMunaıGaz» UK» AQ jaı aktsııalaryna tıesili boldy – 98,3 mlrd teńge (ındekstik aktsııalarmen saýda-sattyqtyń jalpy kóleminiń 79,8 %).

2023 jyldyń 1 shildesine KASE ındeksin esepteý úshin ókildik tizim toǵyz ataýdaǵy aktsııalardan turady, 3 aqpannan bastap KASE ındeksiniń esebine «QazMunaıGaz» UK» AQ jaı aktsııalary engizildi.

Batys qor alańdary 2023 jyldyń birinshi jartyjyldyǵyn taldaýshylardyń kópshilik boljamdaryna qaramastan aıtarlyqtaı ósimmen aıaqtady: SP 500 16,36 %, Nasdaq – 32,74 %, al Dow Jones – 3,84 % ósti.

«Qor naryǵynyń ósý úrdisi bastapqyda IT sektory kompanııalarynyń aktsııalary esebinen qalyptasty, biraq ekinshi toqsanda ósý basqa sektorlarǵa taraldy jáne jartyjyldyq qorytyndysy boıynsha jasyl aımaqta ekonomıkanyń 11 sektorynyń jeteýi jabyldy. Maýsym aıynyń qorytyndysy boıynsha ekonomıkanyń barlyq sektorlarynda ósim baıqaldy»,- dep habarlady qor bırajasynan.

KASE-de ındekstik sebettiń toǵyz ókiliniń segizi jasyl aımaqta jabyldy.

Bul rette qazaqstandyq naryqta – álemdik trendtermen salystyrǵanda – qarjy sektorynyń aktsııalary ósý kóshbasshylaryna aınaldy.

«Qazaqstan halyq jınaq banki» AQ jaı aktsııalary birinshi jartyjyldyqtyń qorytyndysy boıynsha aktsıonerlerge qun ósiminiń 29,7 %, sondaı-aq 15,5 % mólsherinde dıvıdendtik kiristilikti ákeldi.

Quny 14,8 %, sondaı-aq dıvıdend kiristiligi 4,6 % ósimimen ekinshi orynda «QazTransOıl» AQ jaı aktsııalary tur.

Kaspi.kz kóshbasshylarynyń úshtigin jabady, onyń jaı aktsııalary jarty jylda 12,7 %-ǵa ósip, 2022 jyldyń aqpannyń deńgeıine deıin qalpyna keldi.

«Ksell» AQ jáne «Qazaqtelekom» AQ telekommýnıkatsııalyq operatorlarynyń aktsııalary tıisinshe 10,1 % jáne 8,6 %-ǵa ósti.

«QazMunaıGaz» UK» AQ aktsııalary jartyjyldyqtyń qorytyndysy boıynsha 10 097,99 teńgege jetti, bul ótken jyldyń jeltoqsanda ornalastyrý baǵasynan 20,1 % joǵary.

Jarty jyldy 2,8 % tómendeýmen japqan jalǵyz ındekstik kompanııa «KEGOC» AQ boldy.