Jyl basynan beri elordada 33 náresteniń júregine ota jasalǵan

ASTANA. QazAqparat – Jyl basynan beri Astanada bir aıǵa tolmaǵan 33 sábıdiń júregine ota jasalǵan. BAQ ókilderiniń qatysýymen ótken brıfıngte «Áleýmettik medıtsınalyq saqtandyrý qory» elordadaǵy fılıalynyń dırektory Nurlybek Qabdyqaparov osylaı málimdedi, dep habarlaıdy QazAqparat tilshisi.

«Ótken jylmen salystyrǵanda, bıyl elordada ota jasaý kórsetkishi 3,6 paıyzǵa ósti. Tek joǵary tehnologııalyq medıtsınalyq kómekti qoldana otyryp, MÁMS arqyly 17,04 mlrd teńge somasyna qosymsha 6130 qyzmet kórsetildi. Onyń ishinde kardıologııa boıynsha – 478 ota, kardıohırýrgııalyq – 1206 ota, neırohırýrgııalyq ota – 612 adamǵa, ortopedııalyq ota – 172 patsıentke; nesep-jynys júıesi aýrýlary boıynsha – 2039, as qorytý aýrýlary boıynsha 429 patsıentke ota jasalǵan. Barlyǵy 303 438 patsıentke em júrgizilgen» - dep atap ótti Nurlybek Qabdyqaparov.

Munymen qatar, ol bıyl Astanada bir aıǵa tolmaǵan 4 800 nárestege medıtsınalyq kómek kórsetilgenin atap ótti.

«0-28 kúndik 4800 nárestege 2 mlrd 125 myń teńge somasyna medıtsınalyq kómek kórsetildi. Onyń ishinde 33 balaǵa 92 mln 598 myń teńge somasyna joǵary tehnologııalyq medıtsınalyq kómek arqyly júrekke ota jasalyp, ońaltýdyń birinshi satysynan ótken», - dep toqtaldy Nurlybek Qabdyqaparov.

Qosa ketsek, buǵan deıin elorda turǵyndary bes jylda MÁMS júıesine 157,8 mlrd teńge aýdarǵanyn habarlap edik.