Jyl basynan beri elimizde áýe kóligimen 1,6 mln jolaýshy tasymaldandy

NUR-SULTAN. QazAqparat - 2020 jyldyń І toqsanynda elimizde áýe kóligimen 1,6 mln jolaýshy tasymaldandy. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat tilshisi.

«Statıstıka komıtetiniń derekterine sáıkes, 2020 jyldyń І toqsanynda tasymaldanǵan jolaýshylar sany 1 mln 687 myń adamdy qurady. Bul kórsetkish ótken jyldyń sáıkes kezeńimen salystyrǵanda 5,2 paıyzǵa (2019 jyly – 1 mln 604 myń adam) kóp», - delingen mınıstrliktiń Telegram paraqshasynda jarııalanǵan aqparatta.

Vedomstvo málimetinshe, naýryz-sáýir aılarynda Qazaqstanda áýe kóligimen jolaýshy tasymaly 70 paıyzǵa qysqardy. Óıtkeni, 1 sáýirden bastap tótenshe jaǵdaılar memlekettik komıssııasynyń tapsyrmasyn oryndaý aıasynda qazirge deıin 97 halyqaralyq baǵyt boıynsha aptasyna 440 reıs nemese barlyq halyqaralyq reıstiń 99 paıyzy qysqartyldy.

1 sáýirden 1 mamyrǵa deıin barlyq turaqty ishki reıster de toqtatyldy.