Jyl basynan beri elimizde 141 adam sýǵa batyp ketti - TJM

ASTANA. QazAqparat – Jyl basynan beri elimizde 141 adam sýǵa batyp ketti, onyń 39-y – bala. Bul derekter ótken jylǵy kórsetkishterden tómen, dep habarlaıdy QazAqparat TJM Azamattyq qorǵanys jáne áskerı bólimder komıtetine silteme jasap.

«Shomylý maýsymynyń jartysy ǵana ótkenin eskerý qajet. Ystyq kúnder áli alda. Shomylý maýsymynyń sońyna deıin taǵy qansha adamnyń ómiri úziletinin elestetý qıyn», - delingen komıtet málimdemesinde.

Osyǵan baılanysty, qutqarýshylar qaýipsizdiktiń qarapaıym erejelerin saqtaý qajettigin eske salady. Olardyń negizgileri:

- tek ruqsat etilgen (jabdyqtalǵan) jerlerde shomylý;

- sýǵa shomylýǵa tyıym salynǵan jerlerge kirýge qatań tyıym salynady;

- sý mańyndaǵy demalysta alkogoldi, esirtki zattaryn paıdalanbaý;

- qalqymalardan asyp júzbeý;

- jartastardan, shatqaldardan jáne osy maqsattarǵa arnalmaǵan basqa jerlerden sýǵa sekirmeý;

- sý kólikterine jaqyn júzýge bolmaıdy;

- dabyl týraly jalǵan dybystar shyǵarmaý;

- jáne eń bastysy, balalardy qaraýsyz qaldyrmaý.

«Barlyq azamattardy óz ómirleri men jaqyndarynyń ómirine barynsha jaýapkershilikpen qaraýǵa shaqyramyz. Atalǵan erejelerdi qatań saqtańyz. Sonda ǵana biz ondaǵan, júzdegen adamdardyń ómirin saqtaı alamyz, olardyń árqaısysyn úılerinde jaqyndary kútedi», - dep jazady komıtettegiler.