Jyl basynan beri «Batys Eýropa - Batys Qytaı» avtomagıstraliniń 377 shaqyrymy salyndy

ASTANA. 3 shilde. QazAqparat - Avtomobıl joldary komıtetiniń aqparatyna sáıkes «Batys Eýropa - Batys Qytaı» kólik dáliziniń 1 233 shaqyrymy búgingi kúni qurylys jumystarymen qamtylǵan. Aǵymdaǵy jyldyń sońyna deıin halyqaralyq dálizdiń qazaqstandyq bóliginiń taǵy 384 kılometrinde qurylys jumystary bastalady.

«Joba belgilengen kestege sáıkes júzege asyrylýda. Bıylǵy jyly 806 shaqyrym joldyń qurylysyn aıaqtaýdy josparlap otyrmyz. Qazirgi kúni sonyń 377 km tósedik. Al, ótken jyldary 915 km joldy paıdalanýǵa berdik», - deıdi komıtet tóraǵasy Zamır Saǵynov.

Saǵynov sondaı-aq, aldaǵy shilde aıynda «Shymkent - Jambyl oblysynyń shekarasy» avtojolynyń 80 shaqyrymdy quraıtyn ýchaskesinde qurylys jumystaryn bastaý josparlanyp otyrǵanyn aıtyp ótti. Qazirgi kúni merdigerlermen shart jasasý úderisi júrgizilýde. Munyń syrtynda uzyndyǵy 304 shaqyrym quraıtyn jáne qurylysy jaqyn ýaqytqa josparlanǵan «Almaty - Qorǵas» ýchaskesi boıynsha tenderlik usynystardy baǵalaý jumystary da júrgizilýde. Bul konkýrsqa 47 kompanııa qatysqan bolatyn.

«Batys Eýropa - Batys Qytaı» halyqaralyq kólik dálizi jobasyn júzege asyrýǵa 35 000 jol mamany, onyń 579-y sheteldik maman, 5 000 tehnıka, 30 asfalt-beton, 24 tsement-beton zaýyty jumyldyrylǵan.

«Batys Eýropa - Batys Qytaı» halyqaralyq kólik dáliziniń qazaqstandyq ýchaskesi 2 787 kılometrdi quraıdy, onyń 2 452 kılometrin qaıta salý qajet. Jobany júzege asyrýǵa bıýdjet qarajatynan bólek 5 halyqaralyq qarjy ınstıtýttarynan qarajat bólindi. Magıstral boıyndaǵy qurylys jumystaryn 17 bas merdiger jáne 45 otandyq qosalqy merdigerlik uıym júzege asyrýda.