Jyl basynan beri balalarǵa arnalǵan járdemaqyǵa bıýdjetten 162 mlrd teńge tólendi
Búginde memleket tarapynan otbasylardyń 5 sanatyna áleýmettik qoldaý kórsetiledi: 1 jasqa deıingi balalary bar analar men otbasylarǵa, kópbalaly otbasylarǵa, múgedek balalary bar otbasylarǵa, tabysy az otbasylarǵa, asyraýshysynan aıyrylǵan jáne balalardy qamqorshylyqqa alǵan otbasylarǵa.
«Bala týǵan kezde bir rettik járdemaqy beriledi, onyń mólsheri balanyń týý kezegine baılanysty bolady. 2019 jyly birinshi, ekinshi, úshinshi balanyń dúnıege kelýine baılanysty járdemaqy mólsheri 95 950 teńgeni qurasa, tórtinshi jáne odan da kóp balaǵa – 159 075 teńgeni quraıdy. Búginde 308,6 myń adam 33,7 mlrd teńge kóleminde járdemaqy aldy», - delingen Eńbek jáne halyqty áleýmettik qorǵaý mınıstrliginiń málimetinde.
Sonymen qatar, bir jasqa deıingi bala kútimi boıynsha áleýmettik qoldaý kózdelgen. Járdemaqy mólsheri otbasyndaǵy balalar sanyna baılanysty 14 544 teńgeden 22 473 teńgege deıingi mólsherdi quraıdy. Aǵymdaǵy jyldyń basynan beri 137,5 myńnan astam adam 28,5 mlrd teńge kóleminde osyndaı járdemaqy aldy.
Budan bólek, múgedek balany onyń kámelettik jasqa jetkenge deıin tárbıeleıtin adamdardy qoldaýǵa jekelegen áleýmettik sharalar qarastyrylǵan. Aǵymdaǵy jyldyń basynan beri mundaı járdemaqy 30,6 mlrd teńge somasynda 84,6 myń adamǵa tólendi. 2019 jylǵy 1 shildeden bastap onyń mólsheri 41 578 teńgeni quraıdy.
«2019 jylǵy 1 shildeden bastap bala kezinen birinshi toptaǵy múgedektigi bar adamǵa kútim jasaý boıynsha járdemaqy engizildi. Onyń mólsheri – 41 578 teńge. Járdemaqy engizilgennen beri mundaı járdemaqy 4,9 mlrd teńge somasynda 13,6 myń adamǵa tólend», - dep naqtylanǵan vedomstvo habarlamasynda.
«Altyn alqa» jáne «Kúmis alqa» alqalarymen marapattalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen marapattalǵan kópbalaly 235 myń anaǵa tabysyna qaramastan, aı saıyn járdemaqy tólenip keledi. Qazirgi ýaqytta bul járdemaqynyń mólsheri 16 160 teńgeni quraıdy.
Tórt jáne odan kóp kámeletke tolmaǵan balalary bar kópbalaly otbasylarǵa arnaýly memlekettik járdemaqy tólenedi. Aǵymdaǵy jyly járdemaqynyń bul túri 26,7 mlrd teńge kóleminde 253,5 myń otbasyǵa tólendi.
Esterińizge sala keteıik, 2020 jylǵy 1 qańtardan bastap 4 jáne odan da kóp kámeletke tolmaǵan nemese 23 jasqa deıingi kúndizgi oqý bóliminde oqıtyn balalary bar kópbalaly otbasylarǵa jańa memlekettik járdemaqy engizý josparlanýda. Bul járdemaqy otbasynyń tabysyna qaramastan saralanǵan mólsherde taǵaıyndalady: 4 balaǵa – 42 496 teńge; 5 balaǵa – 53127 teńge; 6 balaǵa – 63 757 teńge; 7 jáne odan kóp balaǵa – 74 388 teńge.