Jyl basynan beri avtomobıl kóligimen 5,3 mln jolaýshy tasymaldandy
Indýstrııa jáne ınfraqurylymdyq damý mınıstrliginiń málimetinshe, jyl basynan beri avtomobıl kóligi salasynda respýblıka ishinde 5,3 mln jolaýshy, 675,3 mln tonna júk tasymaldandy. Al halyqaralyq qatynasta 2,3 mln tonna júk tasymaldansa, onyń ishinde: eksport – 640 myń tonna, ımport - 1,7 mln tonna boldy. Sonymen qatar, 380 myń tonna tranzıttik júk tasymaldandy.
Qazirgi ýaqytta avtomobıl tasymaldary salasynda 3,5 myńdaı kásiporyn júk tasymaldaýmen aınalysady. 1 myńdaı kásiporyn turaqty avtobýs tasymaldaryn júzege asyrady. Olardyń 17,5 myńnan astam avtokóligi bar.
Qazaqstan Respýblıkasynyń Indýstrııa jáne ınfraqurylymdyq damý mınıstrligi álemde COVID-2019 koronavırýstyq ınfektsııasynyń taralýyna jáne elimizde tótenshe jaǵdaıdyń engizilýine baılanysty kelesi sharalar qabyldady:
- Qytaı, Reseı, Qyrǵyzstan, Ózbekstan jáne Mońǵolııamen 117 turaqty avtobýs baǵyty toqtatyldy;
- halyqaralyq turaqty emes jáne tranzıttik jolaýshylar tasymalyna tyıym salynady;
- karantın engizilgen óńirlerge/óńirlerden jolaýshylardy oblysaralyq jáne qalaaralyq tasymaldaý toqtatyldy;
- karantın engizilgen aımaqtarda avtovokzaldar men avtostantsııalardyń jumysy toqtatyldy;
- oblystardyń, Nur-Sultan, Almaty jáne Shymkent qalalary ákimdikterine tótenshe jaǵdaı rejımi kezeńinde óńirlerde avtokólikpen jolaýshylar tasymaldaýdy shekteý boıynsha usynymdar joldandy;
- shet memleketterdiń quzyretti kólik organdaryna halyqaralyq qatynasta júkterdi tasymaldaý kezinde sanıtarlyq is-sharalardy saqtaý qajettigi týraly usynymdar jiberildi;
- Qytaımen, Reseımen, Qyrǵyzstanmen jáne Ózbekstanmen memlekettik shekara arqyly 20 jeke avtomobıl ótkizý pýnkti ýaqytsha jabyldy.
Al halyqaralyq jáne respýblıkaishilik qatynasta júk avtokólik quraldarymen júk tasymaldaýǵa shekteýler engizilmegenin aıta ketý kerek.
Qazirgi ýaqytta baǵdarlardyń qysqarýyna nemese toqtatylýyna baılanysty qazaqstandyq avtobýs tasymaldaýshylarynyń ahýalyna saraptamalyq baǵalaý júrgizilip, salany qoldaýǵa qatysty usynylatyn sharalar qarastyrylyp jatyr.