Jyl basynan beri áýe kompanııalary 2,6 mln jolaýshyny tasymaldady

NUR-SULTAN. QazAqparat - Otandyq áýekompanııalar bıylǵy qańtar-sáýir aılarynda ishki baǵytta - 2 mln jolaýshy (2021 jyly – 2,2 mln, 2020 jyly – 1,2 mln jolaýshy), halyqaralyq baǵytta - 622 myń jolaýshy (2021 jyly - 468 myń, 2020 jyly - 431 myń) tasymaldady, dep habarlaıdy QazAqparat.

Atap aıtqanda, «Air Astana» kompanııasynyń jolaýshylar aǵyny - shamamen 1,1 mln jolaýshy, «FlyArystan» - 761 myń jáne «SCAT» - 630 myńǵa jýyq jolaýshy.

Eldiń áýejaılarynda qyzmet kórsetilgen jolaýshylar sany - 5,1 mln. Bul ótken jylǵy kórsetkishten 9%-ǵa artyq (2021 jyly – 4,7 mln, 2020 jyly – 3,3 mln).

Qazirgi ýaqytta ishki áýe reısterin 5 otandyq áýekompanııasy aptasyna 605 reıs jıiligimen 57 baǵyt boıynsha oryndaıdy.

Halyqaralyq reıster 27 elge aptasyna 433 reıs jıiligimen 99 baǵyt boıynsha oryndalady.

Bul - Túrkııa, BAÁ, Ózbekstan, Grýzııa, Tájikstan, Reseı, Qyrǵyzstan, Belarýs, Germanııa, Egıpet, Ońtústik Koreıa, Nıderland, Polsha, Armenııa, Ulybrıtanııa, Maldıv araldary, Taıland, Ázerbaıjan, Katar, Kýveıt, Saýd Arabııasy, Mońǵolııa, Úndistan, Iran, Chehııa, Gretsııa (1 maýsymnan bastap) jáne Italııa (12 maýsymnan bastap).