Jyl basynan beri áleýmettik tólemge 77 mlrd teńge jumsaldy

NUR-SULTAN. QazAqparat - Bıylǵy úsh aıda Memlekettik áleýmettik saqtandyrý qorynan 59,2 myń áıel júktilikke jáne bosanýǵa, jańa týǵan balany asyrap alýǵa baılanysty tabysynan aıyrylǵan soń, jalpy somasy 33,9 mlrd teńge áleýmettik tólem aldy, dep habarlaıdy QazAqparat.

Eńbek jáne halyqty áleýmettik qorǵaý mınıstrliginiń málimetinshe, 1 jasqa deıingi bala kútimine baılanysty tabysynan aıyrylǵan 423,5 myń adam 42,6 mlrd teńge somasynda áleýmettik tólemge ıe bolǵan. .

«Joǵaryda kórsetilgen tólemderdiń birinshisin alý quqyǵy júktilik jáne bosaný boıynsha ýaqytsha eńbekke jaramsyzdyq paraǵynda kórsetilgen kúnnen bastalady. Bul áleýmettik tólemniń mólsheri jumys isteıtin áıeldiń sońǵy jyldaǵy MÁSQ-ǵa kelip túsken áleýmettik aýdarymdary men eńbekke qabyletsizdik kúnderiniń sanyna qaraı bolady.

Ekinshi tólemdi alýdyń negizgi sharttary – kiristi joǵaltý jáne bala 1 jasqa tolǵanǵa deıin naqty kútim jasaý. Tólem mólsheri balanyń týǵan kúnine deıingi sońǵy 2 jyl ishinde MÁSQ-ǵa túsken áleýmettik aýdarymdarǵa qaraı, ortasha aılyq tabystyń 40%-yn quraıdy. Bul rette osy tólemniń eń tómengi mólsheri jumys istemeıtin áıelderge taǵaıyndalatyn 1 jasqa deıingi bala kútimi jónindegi osyǵan uqsas aı saıynǵy memlekettik járdemaqynyń mólsherinen kem bolmaýy tıis», - dep túsindirgen habarlamada.

Jazbadan belgili bolǵany, eń joǵarǵy mólsher eń tómengi jalaqynyń jeti eselengen mólsheriniń 40%-ynan aspaýy tıis.

Áleýmettik tólemderden 10 % mindetti zeınetaqy jarnalary ustalyp, Biryńǵaı jınaqtaýshy zeınetaqy qoryndaǵy shotyna aýdarylady.