Jyl basynan beri áleýmettik mańyzy bar taýarlardyń baǵasy 4,2%-ke ósti

ASTANA. QazAqparat - Úkimettiń Tsıfrlyq keńsesinde QR Premer-Mınıstri Álıhan Smaıylovtyń tóraǵalyǵymen ótken Respýblıkalyq shtab otyrysynda áleýmettik mańyzy bar azyq-túlik taýarlarynyń (ÁMAT) baǵasyn turaqtandyrý máseleleri talqylandy, dep habarlaıdy QazAqparat Úkimettiń resmı saıtyna silteme jasap.

Saýda jáne ıntegratsııa birinshi vıtse-mınıstri Arman Shaqqalıev atap ótkendeı, jyl basynan beri ÁMAT baǵasynyń ósimi 4,2%-dy, al mamyr aıynyń qorytyndysy boıynsha 0,7%-dy qurady. Bıyl bul kórsetkish boıynsha Astana (6,1%), Shyǵys Qazaqstan oblysy (5,3%) jáne Jetisý oblysy (5,3%) antılıder boldy. Pııaz, qyryqqabat, kúrish jáne sábizdiń baǵalary barynsha qymbattady, al qaraqumyq, qant, kúnbaǵys maıy men unnyń baǵasy tómendedi.

QR SIM ınflıatsııa deńgeıin 2 esege tómendetý maqsatynda ÁMAT baǵasynyń ósýine barynsha áser etetin azyq-túlik taýarlaryn óndirýshilerdi qoldaýǵa baǵyttalǵan jańa tásildi ázirledi. Buǵan sıyr eti, kúnbaǵys maıy men sary maı, kúrish, qant jáne kókónister jatady. Búgingi tańda 78 negizgi óndirýshi anyqtaldy. Jańa algorıtm sheńberinde árbir taýarǵa – óndirý men saqtaýdan bastap satýǵa deıin baǵdarlanǵan tásil qamtamasyz etiledi.

Premer-Mınıstr jalpy, tek mamyr aıynyń ózinde ǵana qyryqqabat 22,3%, sábiz 10,8%, pııaz 9,6%, kartop 6,6%-ǵa qymbattaǵanyn atap ótti. Bul jergilikti jerlerdegi maýsymdyq kezeńde naryqty kókónistermen qamtamasyz etý jumystarynyń tıimsizdigin kórsetedi.

Ol sondaı-aq Aýyl sharýashylyǵy mınıstrligi tarapynan úılestirý jumystarynyń álsizdigin atap ótti.

«Baǵany turaqtandyrý úshin naryqta usynys únemi kóp bolýy tıis. Mysaly, Saýda, Aýyl sharýashylyǵy mınıstrlikteri men ákimdikter aqpan-naýryz aılarynda Tájikstanmen pııaz satyp alý máselesin pysyqtaı bastady. Alaıda, ony pııazdyń baǵasy 10%-ǵa deıin ósip ketken ýaqytta, ıaǵnı mamyr aıynda ǵana satyp aldy. Taýardy tıimdi baǵamen alatyn múmkindikti qoldan shyǵaryp aldyq. Ár óńir óz ereksheligin biledi, sondyqtan óndirýshilermen aldyn-ala memorandýmdar bekitýi kerek», — dep atap ótti Premer-Mınıstr.

Úkimet basshysy ÁMAT baǵasyn tejeý jónindegi jańa algorıtmniń tolyqqandy iske asyrýdy jáne aýyl sharýashylyǵy taýaryn óndirýshilermen kelisim-sharttardyń ýaqytyly jasalýyn qamtamasyz etýdi, sondaı-aq tıimsiz deldaldardy anyqtap, olardy joıý jumystarynyń sapasyn arttyrýdy jáne saýda ústemelerine baqylaýdy kúsheıtýdi tapsyrdy.