Jyl basynan beri alaıaqtar elge 3 mlrd teńgeden astam shyǵyn keltirdi

ASTANA. QazAqparat – Osy jyldyń 3 aıynda respýblıkada 4 myńnan astam ınternet-alaıaqtyq tirkeldi. Bul týraly ІІM krımınaldyq polıtsııa departamenti kıberqylmysqa qarsy kúres ortalyǵynyń bastyǵy Jandos Súıinbaı aıtty, dep habarlaıdy QazAqparat tilshisi.

«Qoǵamdy tsıfrlandyrýdyń qanshalyqty mańyzdy ekenin bárimiz bilemiz. Qazir onlaın-rejımde memlekettik, sondaı-aq banktik jáne ózge de qyzmetterdi alýǵa bolady. Ókinishke oraı muny qylmyskerler, atap aıtqanda alaıaqtar da belsendi qoldanady. Osy jyldyń úsh aıynda 4 myńnan asa ınternet-alaıaqtyq tirkeldi. Alaıaqtardyń áreketi saldarynan azamattarǵa 3 mlrd teńgeden astam shyǵyn keldi», - dedi ortalyq bastyǵy mınıstrliktiń baspasóz qyzmeti alańynda ótken brıfıngte.

Onyń atap ótýinshe, ınternet-alaıaqtyqtyń eń kóp taraǵan tásili – onlaın saýda.

Ol úshin belgili saýda alańdarynyń saıttarynda, sondaı-aq áleýmettik jeliler men messendjerlerde jarnamalar ornalastyrylady.

«Alaıaqtar taýardyń nemese qyzmettiń tómen baǵasyn kórsetip, aldyn ala tólemdi nemese tolyq tólemdi suraıdy. Bıyl osyndaı 2 myńnan asa qylmys tirkeldi», - dedi Jandos Súıinbaı.