Jyl basynan beri aqparattyq tehnologııalarǵa qatysty 1,5 myń qylmys tirkelgen

ASTANA. QazAqparat - Jedel-izdestirý is-sharalary barysynda Túrkistan oblysy Polıtsııa departamentiniń qyzmetkerleri ońtústik óńirdiń turǵyndary jasaǵan birqatar ınternet-alaıaqtyqtardy ashty, – dep habarlaıdy QazAqparat Polisia.kz saıtyna silteme jasap.

Máselen, Shymkent qalasynyń turǵyny ınternet-alaıaqtyqty turaqty tabys kózine aınaldyryp, «InDriver» qosymshasy arqyly jolaýshylardy tasymaldaýǵa tapsyrys berý syltaýymen aldaý arqyly júrgizýshilerdiń jeke derekterin – jeke kýálikterin, tekserý úshin fotosýretterdi, sondaı-aq bank shottarynyń derekterin alǵan. Sodan keıin kúdikti jábirlenýshilerdiń atynan nesıe resimdegen. Qazirgi ýaqytta onyń osyndaı toǵyz faktige qatysy bary belgili boldy.

Oblys polıtseıleri taǵy bir alaıaqty ustady. Ol ózin spýtnıktik teledıdar qyzmetkeri retinde tanystyra otyryp, azamattardyń jeke derekterin alyp, shaǵyn nesıe beretin uıymdarda qaryz resimdedi. Alaıaq osyndaı 30-dan astam faktilerge qatysty. Kúdiktiler ýaqytsha ustaý ızolıatoryna qamaldy. Olardyń basqa qylmystarǵa qatysyn anyqtaýǵa baǵyttalǵan is-sharalar kesheni júrgizilýde.

Aqparattyq tehnologııalardy ómirimizdiń barlyq aspektilerine keńinen engizý kıberqylmystyń, ásirese ınternettegi alaıaqtyqtyń ósýine áser etti. Jyl basynan beri osyndaı 1,5 myń qylmys tirkelgen.