Jyl basynan beri 93 adam poıyz astyna túsken
16 jeltoqsanda Túrkistan oblysy Mankent stantsııasynda júk poıyzy temirjolda belgilenbegen jerden ótip bara jatqan kámeletke tolmaǵan qyzdy janaı qaǵyp ketti.
Mashınıst shuǵyl tejeý qoldanyp, dybystyq sıgnal bergenimen, basyna kapıýshon men qulaqqap kıip alǵan qyz bala sıgnaldy estimegen.
Ol Saıram aýdanynyń ortalyq aýrýhanasyna jetkizildi.
Bul týraly kóliktegi polıtsııa departamenti bastyǵynyń birinshi orynbasary Madııar Aıtýǵanov málimdedi.
Atalǵan fakti boıynsha QR QK 344-babynyń 1-bóligi boıynsha sotqa deıingi tergeý bastaldy.
Jyl basynan beri temirjol tósemin belgilenbegen jerlerden ótkeni úshin kólik polıtseıleri 25 403 azamatty anyqtap, ákimshilik jaýapkershilikke tartty.
Sondaı-aq poıyzdardyń shuǵyl tejelýiniń 2162 faktisi tirkeldi, onyń ishinde temirjoldaǵy adamdar úshin – 365, úı janýarlaryna baılanysty 1537 márte poıyz toqtaǵan.
– Departament pen onyń aýmaqtyq bólinisteri qyzmetkerleriniń júrgizgen profılaktıkalyq jumystaryna qaramastan, azamattar temirjol kóligi nysandarynda qaýipsizdik erejesin buzýdy jalǵastyrýda, sonyń saldarynan óz ómiri men densaýlyǵyna qaýip tóndirip otyr, – deıdi Aıtýǵanov.
Onyń aıtýynsha, jyl basynan beri 93 adam jyljymaly quramnyń astyna túsken, onyń 61-i ólimmen aıaqtalǵan, 12 fakti boıynsha balalar zardap shekken, ókinishke qarraı onyń 8-i kóz jumdy.
Jazataıym oqıǵalardyń negizgi sebepteri – azamattardyń kólik ınfraqurylymy obektilerinde qaýipsizdik erejesin buzýy jáne ózderiniń jeke qaýipsizdigine nemquraıly qaraýy.
Departamenti bastyǵynyń birinshi orynbasary qaýipsizdik erejelerin qatań saqtaý jáne temir joldan tek arnaıy belgilengen jerlerde ótý kerektigin taǵy da eske saldy.
Vagondar arasynan ótýge, temir joldan ótý kezinde shpaldardyń shetimen, temirjol joldarynyń arasymen júrýge, sondaı-aq qaýipti aımaqtan óterde qulaqqap pen telefon paıdalanýǵa bolmaıdy.