Jyl basynan beri 7 jasyryn kazıno men 30 býkmekerlik keńse jabylǵan

NUR-SULTAN. QazAqparat - Qarjy monıtorıngi komıteti bıylǵy 9 aıda atqarǵan jumysyn qorytyndylady, dep habarlaıdy QazAqparat.

Memleket basshysynyń ekonomıkalyq tergeý qyzmetin qaıta baǵyttaý jónindegi tapsyrmasyn iske asyrý sheńberinde jedel-aldyn alý sharalarynyń kesheni uıymdastyryldy.

Atap aıtqanda, munaı jáne munaı ónimderiniń kóleńkeli aınalymyna qarsy is-qımyl maqsatynda «Barrel» jedel-aldyn alý sharasy iske asyrylýda.

Qazirgi tańda elimizdiń 5 aýmaǵynda osy saladaǵy faktiler tergeýde, olardyń «kóleńkeli» aınalymy - 25,1 mlrd teńge somasyna 140 myń tonnadan astam janar-jaǵarmaı.

«Stop-ıgra» jedel-aldyn alý sharasy aıasynda 206 zańsyz oıyn ornynyń qyzmetine shek qoıyldy, elimizde 7 jasyryn kazıno jáne 30 býkmekerlik keńse anyqtalyp, joıyldy. Zańsyz aınalymnan 2660 oıyn avtomaty, termınaldar jáne poker ústelderi tárkilenip alyndy.

Jalǵan alkogol ónimin óndirý boıynsha 25 jerasty tsehy anyqtaldy. Zańsyz aınalymnan 620 myńnan astam bótelke alkogol, 140 myń lıtrge jýyq spırt jáne 60 myńnan astam jalǵan esepke alý-baqylaý markasy alyndy.

ETQ jalǵan aqsha jasaý salasynda 185 qylmystyń jolyn kesip, 2000 astam kýpıýra tárkilep aldy.

Sondaı-aq, Almaty jáne Qostanaı qalalarynda jalǵan aqsha jasaıtyn 2 jasyryn tıpografııa joıyldy.