Jyl basynan beri 7,7 mln sharshy metr turǵyn úı paıdalanýǵa berildi

NUR-SULTAN. QazAqparat – Bıylǵy qańtar-shilde aılarynda Qazaqstandaǵy qurylys jumystary 8,6% ulǵaıdy. Bul týraly QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Jyl basynan beri qurylys jumystarynyń kólemi 8,6%-ke ulǵaıdy, 17 óńirde ósim tirkelgen. Ásirese, qurylys-montajdaý jumystarynyń eń joǵary ósýi Almaty, Aqmola jáne Ulytaý oblystarynda, Shymkent qalasynda. Al, qurylys jumystary kóleminiń tómendeýi Mańǵystaý, Abaı jáne Jetisý oblystarynda baıqaldy», - dedi Ulttyq ekonomıka mınıstri búgingi Úkimet otyrysynda.

Onyń aıtýynsha, qańtar-shilde aılarynda 7,7 mln sharshy metr turǵyn úı paıdalanýǵa berildi, bul 2021 jylǵy osy kezeńnen 0,8%-ke tómen bolyp otyr. Oń ósý 14 óńirde tirkeldi. Eń joǵary kórsetkishter Túrkistan, Pavlodar jáne Qostanaı oblystarynda, sondaı-aq Shymkent qalasynda. Al, tómendeý Ulytaý, Mańǵystaý, Atyraý, Jetisý oblystarynda, sondaı-aq Almaty jáne Nur-Sultan qalalarynda baıqaldy.

Aıta keteıik, Úkimette Qazaqstannyń qańtar-shilde aılaryndaǵy áleýmettik-ekonomıkalyq damý qorytyndysy qaralyp jatyr. QR Ulttyq ekonomıka mınıstri Álibek Qýantyrovtyń baıandaýynsha, atalǵan kezeńde Qazaqstan ekonomıkasy 3,3%-ke ósken.

Sonymen birge, qańtar-shilde aılarynda Qazaqstandaǵy óndiris kólemi 4,9%-ke artty .